«Ekspo» qalashyǵynyń 36 nysanynyń barlyǵy «terorızm qaýpi joǵary» nysandar qataryna enip otyr, - dep habarlaıdy Qamshy.kz Astana arnasyna silteme jasap.

Bul týraly búgin Bas prokýratýra ǵımaratynda ótken kórmeniń úılestirý keńesiniń otyrysynda aıtyldy. Kórme qurylysynda jumys istep jatqan 32 myńnan astam adam arnaıy tekseristen ótip, qalashyqqa jarylǵysh zattar men ýly zattardyń kirgizilmeýi qatań qadaǵalanyp otyr.

-Búginge deıin qalashyqta 170-ten astam tekseris júrgizildi. Eksponyń barlyq 36 nysany terrorlyq shabýyl qaýpi joǵary dep tanylyp otyr. Memleket basshysy sporttyq jappaı is-sharalar ótkizý týraly zańnyń qaýipsizdik sharalaryna qatysty ózgeristerin bekitti. Qalashyqtyń qaraýyly, tipti qurylysshylar da arnaıy qyzmettiń tekserisinen ótti. Onyń ishinde olardyń túrli dinı uıymdarǵa qatysy da qatań tekserildi, - deıdi QR Premer-mınıstriniń birinshi orynbasary Baqytjan Saǵyntaev.

Quzyrly vedomstvolar halyqaralyq kórme kezinde qalada birqatar shekteýlerdiń bolatynyn aldyn-ala eskertedi. Máselen, qarý-jaraq saýdasy men beıbit sherý ótkizý tártibi qatańdatylady. Mamandar qaýipsizdik sharalaryna túsinistikpen qaraýǵa shaqyrady. Kórmeniń otyz kúninde qoǵamdyq qaýipsizdikti qamtamasyz etýge syrttan da kúsh tartylady. Elimizdiń Bas prokýrory ol úshin BUU-nyń arnaıy mamandarynyń tájirıbesimen bólispek. Sonyń arqasynda elde adamnyń is-qımyly men sóıleý mánerinen kúdiktini syrttaı tanıtyn «profaıler» mamandar daıyndalady. Elordanyń qaýipsizdik deńgeıi arnaıy kartaǵa syzylmaq. Smartfonǵa ornatylǵan baǵdarlama arqyly qalanyń qaı bóliginde eń kóp qylmys jasalatyny, qaı aýdan eń qaýipsiz ekeni belgilenedi.