Kim salafızm aǵymynyń birin aqtap, jaqsy qylyp kórsetkisi kelse, soǵan birden toıtarys berilýi tıis. Salafızmge qaýipti kózqarastar ǵana tán. Zakon.kz agenttigine suhbat bergen QR Mádenıet jáne sport mınıstrligi Din isteri komıtetiniń ǵylymı-zertteý jáne saraptamalyq ortalyǵynyń dırektory Aınur Ábdirásilqyzy osylaı degenin jazady 365info.kz. Bul týraly Qamshy.kz habarlaıdy.
Qazaqstanda salafızmniń takfırshi, madhalıt jáne sýrýrıt degen birneshe aǵymy bar. Ataýy men ádistemesinde birqatar ereksheligi bar bolǵanymen, olardyń ıdeologıasy men maqsaty bir, oqyp, ýaǵyzdaıtyn ádebıetteri de bir bolyp keledi.
Sondyqtan, ıdeologıalyq jaǵynan alǵanda, salafızm ishindegi aǵymdardyń birin radıkaldyq, taǵy birin tózimdi, ıaǵnı jaramdy dep bóle-jara qaraýǵa bolmaıdy.
Kim sáláfı aǵymynyń birin aqtap, jaqsy qylyp kórsetkisi kelse, soǵan birden toıtarys berilýi tıis. Olardyń ishindegi keıbir aǵymdy «tózimdi» dep tańbalaý keıbir arab elderine tán qubylys. Onda da olar buǵan lajsyzdyqtan baryp otyr.
Al, bizdiń zaıyrly memlekette dinı, tanymdyq, tipti saıası keńistikte de salafızmniń «tózimdiligi» týraly kózqarastar aıtylmaýy kerek, bul, tipten aqylǵa qonymsyz. Óıtkeni, dástúrli emes kózqarasty jaqtaýshylar shekten shyǵýǵa árdaıym daıyn turady.
Qazaqstandyq dintanýshylar, teologtar ishinara bólingenimen, takfırshiler, madhalıtter, sýrýrıtter ózderin jalpaq tilmen salafılermiz dep ataıdy degen pikirdi aıtyp jatady. Demek, olar ózderiniń pozısıasy men ustanymy ortaq ekenin moıyndaıdy.
Máseleni basqa jaqqa aýdaryp, salafızm aǵymyndaǵynyń bireýin aqtap alǵysy keletinder, onyń qoǵamǵa dendep enýine jol sala beredi. Olardyń osyǵan deıingi «tózimdi salafı» týraly túsinik saıasaty tájirıbede óz jemisin bermedi.
Tipti, taǵdyry men tarıhy uqsas postkeńestik keńistikti alyp qarańyzdar, eshkim «tózimdi salafızm» degen qubylysty anyqtap, moıyndaǵan joq.
Búginderi kóptegen arab eli salafızm ustanymy ıslam dinine jat ekenin de sózsiz rastaıdy. Osylardy esepke ala otyryp, biz salafızmmen baılanysty barlyq túsinikti qaıtadan qarastyrýymyz kerek.
Qazaqstandaǵy terrorlyq oqıǵalar «tózimdi salafızm» degen túsiniktiń joq ekenin dáleldedi. Salafızmge qaýipti kózqarastar ǵana tán. Qaıǵyly oqıǵalardan sabaq ala otyryp, biz quqyqtyq retteý turǵysynda qorytyndy shyǵarýymyz kerek.
Aqparattyq túsinik jumystarynyń qalaı júrgizetinin anyqtap, ǵylymı zertteý salasynda, sol sekildi qoǵamdyq pikirdi bir súzgiden ótkizýimiz tıis.
