Qyzylorda oblysynda oqýshylar men ustazdarǵa mektepte smartfon ustaýǵa tyıym salyndy, dep habarlaıdy Qamshy.kz BNews.kz - ke silteme jasap.

«Respýblıka boıynsha tek Qyzylorda oblysynda alǵash ret barlyq 299 mekteptiń jarǵysyna ózgerister engizildi. Oǵan sáıkes, oqý mekemeleriniń aýmaǵynda ınternetke kirý múmkindigine ıe smartfondardy paıdalanýǵa tyıym salynady. Qońyraý shalý men SMS fýnksıasy bar qarapaıym telefondardy ustaýǵa ruqsat», - dep túsindirdi oblys prokýratýrasynyń baspasóz hatshysy Botakóz Seıil.

Zamanaýı gadjetterge qatysty mundaı qatań sharanyń ne úshin qajet bolǵanyn oblys prokýrory Halıdýlla Dáýeshov túsindirip berdi.

«Basty sebep – smartfondardyń oqý prosesine teris yqpal etetini. Balalar kez kelgen ýaqytta ınternetke kirip, rýhanı damýǵa, minez-qulyqqa teris yqpalyn tıgizetin dúnıelerdi oqıdy, kóredi»,- deıdi ol.

Prokýratýra «VKontakte» áleýmettik jelisine kezekti ret monıtorıń júrgizip, 106 qyzylordalyq jetkinshektiń sýısıdke úgitteıtin toptarǵa tirkelgenin anyqtaǵan. Sondaı-aq, Qyzylordadaǵy 26 mekteptiń oqýshylary ózine qol jumsaýǵa ıtermeleıtin 13 topqa tirkelgen.

«Onyń ústine mektep qabyrǵasynda qymbat gadjetter jıi urlanyp jatady. Tyıym salýdaǵy maqsatymyzdyń biri – balalar arasynda qylmystyń beleń alýyna jol bermeý. Tek oqýshylarǵa ǵana emes, muǵalimderge de smartfon ustaýǵa tyıym salynady», - dep tolyqtyrdy Dáýeshov.