Qazaq – eki qabat áıel kókbóriniń etine ne júregine jerik bolsa, keıin týylǵan balasy kókjal bórideı qaısar, jaýjúrek batyr bolady. El qorǵaıtyn er, sóz bastaıtyn sheshen, qol bastaıtyn kósem, kóregen kózdi alyp azamat bolady dep yrym etedi.

Qazaq halqynda osyǵan oraı týǵan «kókjaldyń tuqymy», «bóri minezdi», «bóri azyǵy jolda», «bóri jeti kún jerden, bir kún elden azyq alady», «qasqyrǵa jegen ataq emes, qyrǵan ataq», «bóriniń ulyǵany – táńirge nalyǵany», «bórideı shapty», «bóribasty ulanym», «bóri júrgen jerde shaıtan júrmeıdi», «bóri shapqan qoı semiredi», «bóriniń aýzy jese de qan, jemese de qan» degen sóz tirkesteri bar.

Al anasy osyndaı aty shýly jyrtqysh ańnyń etine jerik bolyp týylǵan bala batyr bolmaı kim bolady. Qazaq mundaı jerikten týylǵan balanyń bitim-pishini erekshe bolady, óńi susty, ótkir kózdi, qanjar sózdi, dóńgelek júzdi, shymyr deneli, qarymdy azamat bolyp ósedi dep nanady. Kókbóriniń boıyndaǵy barlyq qasıet balaǵa darıdy dep senedi. Mundaı bala kıeli, ıeli bolady. El ishinde qadirli bolyp ómir súredi. Halyq qurmetine bólenedi. Er jetkende er júrek batyr bolady. Qarsy kelgen jaýlaryn apyryp-japyryp jalǵyz jeńedi. Elin qorǵaıdy, elin saqtaıdy. Halqyna jeńistik alyp beredi. Jaman minezden aýlaq bolady. Adal jolda júredi. Joıqyn, er júgin kóteredi, el qamyn jeıdi. Sol arqyly qymbaty artyp, jalpaq jurt arasynda bet-bedeli ósedi. Aqyl-parasatty, tolǵamdy, ımandy azamat bolady.

Bolat Bopaıuly Jota Qajy