Biryńǵaı zeınetaqy jınaqtaýshy qorynyń basqarma tóraǵasy Rýslan Erdenaev Qazaqstanda zeınetaqy jınaqtaryn merziminen buryn alý máselesin qozǵaýǵa áli erte dep sanaıdy. Ol úshin jınaqtaýshy zeınetaqy júıesine barlyq eńbekke jaramdy azamattar qatysýy qajet. Degenmen, búginde atalǵan másele úkimet deńgeıinde talqylanyp jatyr, - dep xabarlaıdy QazAqparat.

«Biz qazir Sıngapýr, Malaızıa, sondaı-aq birqatar kórshi elderdiń zeınetaqy júıesin saraptap jatyrmyz. Bir aıta ketetin jaıt, shet elderde zeınetaqy jınaqtary merziminen buryn mindetti túrde salymshynyń densaýlyǵyn nyǵaıtýǵa jáne ony baspanamen qamtamasyz etýge jumsalady. Ol úshin jeke zeınetaqy shotynda jınaq jetkilikti kólemde bolýy kerek. Iaǵnı, zeınetaqy jınaǵynyń kólemi zeınetkerdiń kem degende eń tómengi kúnkóris deńgeıin qamtamasyz etýge jetkilikti bolýy tıis. Al zeınetaqy jınaqtary jetkilikti kólemde bolýy úshin álem elderinde erikti zeınetaqy jarnalaryn tartý jumystary qarqyndy túrde júrgizilip keledi. Demek, elimizde jınaqtaýshy zeınetaqy júıesine barlyq eńbekke jaramdy azamattar qatysýy tıis jáne erikti zeınetaqy jarnalaryn tartý jumystaryn barynsha damytý qajet. Onsyz zeınetaqy jınaqtaryn merziminen buryn alý máselesin sheshý múmkin emes. Qazir, bul másele Úkimet deńgeıinde talqylanyp jatyr», - dep jaýap berdi R.Erdenaev «QazAqparattyń» resmı saýalyna.

Aıta keteıik, búginde qazaqstandyqtar barlyǵy birdeı zeınetaqy salymdaryn merziminen buryn ala almasa da, aqshany erikti túrde salyp jatqan azamattarǵa 50 jasqa kelgende ondaı múmkindik berilip otyr. Budan bólek,  I jáne II toptaǵy múgedekter de zeınetaqy salymdaryn merziminen buryn ala alady. Sondaı-aq zeınetaqy anýıtetin satyp alǵan 50 jastaǵy áıelder men 55 jastaǵy er adamdarǵa ol aqshany paıdalanýǵa ruqsat bar.

Aıta keteıik, BJZQ-ynda 10,1 mln. zeınetaqy salymdary bar. Sonyń basym bóligi - 9,6 mln.-y mindetti zeınetaqy salymdarynyń úlesinde. Qazirgi kezde qazaqstandyqtar salǵan jınaqtardyń jalpy sommasy 6,2 trıllıon teńgeni qurap otyr.