Búgin Elbasy Nursultan Nazarbaev Qarjy mınıstri Baqyt Sultanovty qabyldady, - dep habarlaıdy Qamshy.kz Aqorda saıtyna silteme jasap.

Kezdesý barysynda B.Sultanov Qazaqstan Prezıdentine Qarjy mınıstrliginiń bıylǵy 9 aıda atqarǵan jumysynyń qorytyndysy, respýblıkalyq jáne jergilikti búdjettiń atqarylýy, sondaı-aq Memleket basshysynyń tóraǵalyǵymen 2016 jylǵy 9 qyrkúıekte ótken Úkimettiń keńeıtilgen otyrysynyń qorytyndysy boıynsha berilgen tapsyrmalardyń iske asyrylýy týraly baıandady.

Elbasy búdjet úderisteriniń tıimdiligin odan ári arttyrýǵa, búdjetti qalyptastyrý barysynda ekonomıkanyń ósimine yqpal etetin memlekettik baǵdarlamalarǵa negizdelgen utymdy tásilderdiń qoldanylýyna basa nazar aýdardy.

Sondaı-aq, Qazaqstan Prezıdenti jekeshelendirýdiń ekinshi kezeńin iske asyrý jónindegi sharalardy júzege asyrý qajettigine aıryqsha toqtaldy.

«Memlekettik nysandardy otandyq jáne sheteldik ınvestorlardyń menshigine berý isiniń meılinshe jarıalylyǵy men tıimdiligin qamtamasyz etý qajet», – dedi Nursultan Nazarbaev.

Budan bólek, Memleket basshysy múlikti zańdastyrý jónindegi naýqannyń sońǵy kezeńine qatysty mindetter qoıdy. Máselen, Qazaqstan Prezıdenti bul naýqandy júrgizý barysynda qalyptastyrylǵan jarıalylyq jaǵdaıyn atap ótip, onyń el ekonomıkasy úshin nátıjeliligin aıtty.

«Múlikti zańdastyrý salyq esebinen búdjetti tolyqtyryp, odan ári ekonomıkaǵa paıdasyn tıgizetin aktıvterdi anyqtaýǵa múmkindik beretin bolady. Bul – salyq júıesiniń basty mindetteriniń biri», – dedi Elbasy.

Qarjy mınıstri tıimdi ekonomıkalyq saıasat pen «Nurly jol» memlekettik baǵdarlamasyn iske asyrý barysynda zańnamalarǵa ózgerister engizý, salyq pen kedendik basqarýdy jetildirý esebinen búdjet kirisiniń turaqtanýy jáne bıyl onyń 7,4%-ǵa ósýi baıqalyp otyrǵanyn málimdedi.

Kezdesý qorytyndysy boıynsha Elbasy birqatar naqty tapsyrma berdi.