Qazaqstandyq kásipqoı boksshylar Batyr Júkembaev pen Abylaıxan Qusaıynov el Táýelsizdiginiń 25 jyldyǵyna arnap ótkizgen jekpe-jekterinde kezekti jeńisterine qol jetkizdi.

Boks keshi 17 jeltoqsan kúni Kanadanyń Kvebek qalasynda ótti. Júkembaev óziniń jetinshi kezdesýinde meksıkalyq boksshy Manýel Marezben judyryqtasyp, upaı sanymen jeńiske jetse, Qusaıynov óziniń tórtinshi kezdesýin meksıkalyq Hesýs Pereske qarsy ótkizip, tóreshilerdiń sheshimi boıynsha qarsylasynan basym tústi. 

«Allaǵa shúkir, Qazaq eli úshin osyndaı mańyzdy kún jekpe-jek ótkizip, jeńiske jetkenime. Búgingi jekpe-jegim óz dárejesinen joǵary deńgeıde ótti. Árıne, kezdesý oıńa boldy dep aıta almaımyn. Oǵan jekpe-jek nátıjesi men raýnd sany dálel. Qarsylasym da tájirıbeli boksshy. Biraq bul kezdesýde men jeńiske jettim, Allaǵa shúkir. Jeńisimdi QR Táýelsizdiginiń 25 jyldyǵyna arnaımyn. Jeńis qutty bolsyn, Qazaq eli»,-deıdi A.Qusaıynov.

Eki boksshy da osyǵan deıin sońǵy jekpe-jegin 23 qazan kúni Leme-Rıos shoýynda ótkizip, qarsylastaryn texnıkalyq nokaýtpen utqan edi. Onda Júkembaev meksıkalyq Ivan Pereırany 5 raýndta, Qusaıynov qarsylasyn 2 raýndta texnıkalyq nokaýtqa túsirgen bolatyn.