Esik qalasynda birneshe er azamattan zorlyq kórgen Jibek Mýsınova endi sol qylmyskerlerdiń týystaryn da sotqa bermekshi. Ol túrmege jabylǵan jigitterdiń týystaryn jala japty dep aıyptaýda. Bul týraly Informburo.kz habarlady.

J.Mýsınovanyń qabyldaǵan sheshimin 18 jeltoqsanda onyń qorǵaýshysy málimdedi. Zańger Aıman Ýmarova Jibektiń ne maqsatta sotqa júginbekshi ekenin aıtyp bergen.

"Biz sotta jeńip shyqtyq, kinálilerdiń bári tıisti jazasyn aldy. Biraq, úkim oqylǵannan keıin sottalýshylardyń týystary bizdi jaıymyzǵa qaldyrǵan joq. Olar baspasóz májilisin ótkizip, Jibekke jala japqan. Qazir ol sotqa aryz daıyndap jatyr. Sottalýshylardyń týystaryn jala japqany úshin jazalanýdy talap etemiz. Jala japty dep otyrǵanym, olar Jibekti tóbelesti bastady dep aıyptaıdy. Rasynda ol tóbelespegen, oǵan shabýyl jasalǵan. Tipti, sot-medısınalyq saraptama Jibektiń qanynda alkogóldiń óte az mólsherde bolǵanyn anyqtady. Iaǵnı, ol mas ta bolmaǵan", - deıdi Aıman Ýmarova.

Zańgerdiń aıtýynsha, jábirlenýshige álige deıin sottalǵandardyń týystary tarapynan qysym kórsetilip keledi eken.

"Sottalǵandar týystarynyń baspasóz májilisin ótkizip, BAQ ókilderine bergen aqparattary jalǵan. Bizdiń oıymyzsha, olar osylaısha apelásıalyq komısıaǵa áser etpekshi", - ózin túıdi Jibek Mýsınovanyń qorǵaýshysy.

Esterińizge salaıyq, Esik qalasynyń turǵyny Jibek Mýsınovany zorlady degen kúdikpen tórt jigit ustalǵan bolatyn. Sotta olardyń kinálary tolyq dáleldenip, barlyǵy da uzaq merzimge bas bostandyǵynan aıryldy.

Aıta keter bolsaq, buǵan deıin de Sotta shý shyǵarǵany úshin sottalǵandardyń jaqtastaryna aıyppul salynǵan edi.