Qazirgi kúni kásipkerlikti qolǵa alyp, sharýasyn dóńgeletemin degender úshin jan-jaqty jaǵdaı jasalǵan. Tipten bilmeı jatsań, jer-jerde ashylyp jatqan kásipkerler mektebine baryp oqyp, bolashaq bıznesińniń josparyn jasap alýyńa da bolady. Sondaı azamattardyń biri – «Alıqul ata» sharýa qojalyǵynyń tóraǵasy Faızýlla Áliqulov.
Saıram aýdany Mankent aýyl okrýgine qarasty Aqqala aýylynda ornalasqan «Alıqul ata» sharýa qojalyǵynda bolǵanymyzda qaınaǵan tirliktiń ústinen tústik. Uzyndyǵy 150 metrlik standartty qos qora mal bordaqylaý úshin salynypty. Jem tasyǵan traktorlardyń biri kirip, biri shyǵýda. Qojalyq basshysy Faızýlla aǵa aýdan ortalyǵyna jıynǵa ketken eken. Orynbasary Dilshat Iýnýsov jumys barysymen tanystyrdy. Aıtysyna qaraǵanda mal bordaqylaý úshin úkimetten 7 paıyzdyq jeńildikpen nesıe alǵan. Sol qarjyǵa «aqbas», «semental», «gerford» tuqymdas 420 buqa satyp alyp, bordaqylaýǵa qoıǵan. Erekshe kútimdi talap etetin buqalardyń kúndelikti jem-shóbin ýaqytyly berýdi tájirıbeli mamandar árdaıym nazarda ustap otyrady.
Baǵymdaǵy buqalarǵa kún saıyn salmaq qosý úshin syǵymdalǵan shóp pen 700 keli jentek jem qaınatylyp berilse, aı saıyn 10 tonna shrot, 30 tonna jentek dem, 30 tonna kebek jumsalady eken. Barlyq zootehnıkalyq talaptar saqtalyp, 4 aı baǵylǵan buqalardyń salmaǵy 270-350 kelige jetkende etke ótkiziledi. Iaǵnı ár toqsan saıyn 130 tonnadan eseptelgende, jylyna 520 tonna et óndiriledi degen sóz.
Qazirgi kúni bul sharýashylyqta 11 adam jumyspen qamtylǵan. Aýylda Semeı maldárigerlik-veterınarlyq ınstıtýtyn bitirip kelgen joǵary bilimdi 22 jyl eńbek ótili bar maldárigeri Aıdar Malıkov pen kómekshisi Ulyqbek Baltahodjaev óz isiniń naǵyz sheberleri sanalady. Atshaptyrym mal qoranyń aınalasy tap-taza, kóldeneń jatqan shóp-shalam da baıqalmaıdy. Barlyq jerde – tazalyq pen tártip. Talapqa saı bordaqylanǵan buqalar Saıramdaǵy qushqanada soıylyp, eti Almatyǵa jóneltiledi. Óıtkeni, «Alıqul ata» sharýa qojalyǵy óndirgen tátti et ońtústik astanada da úlken suranysqa ıe.
Shaǵyn ǵana Aqqala aýylynda 3000 halyq bar. Jergilikti turǵyndar negizinen egin egýmen, mal ósirýmen aınalysady. Qarap otyrsań, burynǵydaı beısaýat, jumyssyz sendelip júrgen eshkimdi kórmeısiń. Kez kelgeni bir-bir kásipti dóńgeletip otyr. Demek, ynta-jiger, nıet bolsa qaı jerden de jumys tabylady.
Ábdimálik Belgibaı,
«Ońtústik Qazaqstan»
