QR Eńbek jáne halyqty áleýmettik qorǵaý mınıstri Tamara Dúısenova bolashaqta qaı mamandyqtardyń joıylýy múmkin ekenin aıtty. Bul jaıynda Tengrinews jańalyqtar qyzmeti habarlaıdy.

Mınıstrge úkimettegi baspasóz konferensıasynda jańǵyrtý baǵdarlamasyna baılanysty qaı mamandyqtardyń alynyp tastalatyny jáne qaı mamandyqtardyń qajettiligi artatyny jaıly suraqtar qoıyldy.

Tamara Dúısenovanyń aıtýynsha, bolashaqta kómir ónerkásibi salasy alyp tastalýy múmkin.

“Qazir qarap otyrsaq, bizde parovoz óndirisimen eshkim aınalyspaıdy. Mundaı sala da joq. Sondaı-aq, hatshy-mashınıst mamandyǵy joq. Buryn olar mashınalarda basyp shyǵarý isimen aınalysatyn. Al búgin bizdiń kúndelikti ómirimizde kompúterdiń róliniń artqany sonshalyq – kómir ónerkásibi salasyndaǵy mamandardy daıyndamaıdy. Búginde bizge qaı salalar kerek? Biz úlken jumys tobyn qurdyq. Kómir ónerkásibin alyp tastaýymyz múmkin. Iá, qazir Eýropada kómir óndirisimen aınalysatyn shahtalar kóp. Men osy másele búgin nemese erteń sheshiledi dep aıta almaımyn. Bul másele 20 jyldaı qaralýy múmkin. Sondyqtan biz búgin kómir ónerkásibi salasyndaǵy barlyq mamandyq boıynsha jumys isteýimiz kerek”, – dedi mınıstr.

Tamara Dúısenovanyń aıtýynsha, jańa tehnologıalar jumys kúshiniń ornyn basyp jatyr.

“Ol jerde buryn 10 adam jumys isteý kerek bolsa, qazir onda tek bir adam jumys istep jatyr. Sebebi, barlyq jumys kompúter arqyly istelip jatyr. Osyǵan baılanysty eki baǵytta jumys toby quryldy. Sondaı-aq, taý kendi ıgerý ónerkásibine jańa tehnologıalardy engizý máseleleri de qarastyrylyp jatyr”, – dedi Tamara Dúısenova.