Qyzym... Endi tolsa da úshke jasyń,

Seni oılasam batpaıdy ishken asym.

Adam túgil aıýan da urpaǵy úshin,

Jan qıarlyq tigedi iske basyn.

Qaraımyn da men seniń zamanyńa,

Alańdaımyn kirshiksiz aq aryńa.

Ómir deıtin qardaı aq paraǵyńa,

Túspese eken dep júrmin qara kúná.

Balabaqshań úıretip bar isińdi,

Merekede bıletip "válsyńdy".

Er balaǵa ketsin dep eti úırenip,

Erte bastan óltirmek namysyńdy.

Mektebiń de janashyr emes menshe,

Eleńdeımin erteńiń eles berse.

Birte-birte qysqarǵan ıýbkalardyń,

Ne bolaryn kim bilsin sen óskenshe?!

Týra joldan kóbeıdi aýǵan jandar,

Neken-saıaq tulǵalar taýdan zańǵar.

Saǵan erteń qamqorlyq tanytar ma,

Jaýlyǵymen anańnyń jaý bolǵandar?

Arsyz qyzdyń kek kernep kókiregin,

Álsiz qyzdyń kógertti bet, reńin.

Qaı qolymen besikti terbetedi,

Qanǵa malyp júrgender eki qolyn?

Qyzym... Uıat keltirme sen tegińe,

Erip ketpe essizdiń selteńine.

Tárbıeńe men seniń jaýaptymyn,

Jaýaptysyń sen eldiń erteńine!

Avtory: Jandarbek Bulǵaqov