Qytaı ǵalymdary «Aıdan tabylǵan Gelıı-3 elementi Jerdegi energetıkalyq daǵdarystyń aldyn alýǵa kómektesedi. Eger adam balasy Aıdan bul elementti óndirip alatyn bolsa, odan alynatyn energıa on myń jylǵa jetedi», - dep málimdeme jasaǵan. Bul týraly Massaget.kz.  habarlady.

Qytaı ǵalymdary osylaı álemge jar salýdan buryn Aıdy muqıat zerttegen. Rasynda, Jer seriginiń betki qatparynda termoıadrolyq reaktorǵa shıki ónim bola alatyn paıdaly qazbalar kóp ekeni anyqtaldy.

Gelıı-3 – Jerde óte sırek kezdesetin element. Sebebi, Kún sáýlesiniń atmosfera qabattarynan ótýi kezinde atalǵan elementtiń ızotoptary tysta qalyp qoıady. Al Aıda eshqandaı aýa qabaty bolmaǵandyqtan, Gelıı-3-tiń  ol jaqta mol qory bar.

Qytaı ǵalymdary Gelıı-3 elementin Aı betin 600 gradýsqa ysytý arqyly bólip alýdy josparlap otyr. Sodan soń shıki materıaldar Jerge jiberiletin bolady. Bul elementtiń tipten kishkentaı bólsheginiń sıntezi birshama energıa bere alady. Aıta ketsek, Gelıı-3 elementiniń 0,02 gram sıntezi bir barel munaıdyń esebindegi energıany shyǵarýǵa jetedi.

Mail Online gazetiniń saraptamalyq jumysynda nebary 40 tonna Gelıı-3 elementi búkil AQSH terıtorıasyn bir jyl energıamen qamtamasyz ete alady delingen. Al Aıda bul elementtiń 10 mıllıon tonna qory bar ekeni anyqtaldy. Huffington Post gazeti Aıdan qazyp alynǵan árbir tonna Gelıı-3 elementiniń quny ortasha eseppen 3 mıllıard AQSH dollaryna teń bolatynyn jazady. Bul – Jerdegi munaıdy qoldanǵannan áldeqaıda arzan ári Jer úshin óte paıdaly bolady.

Qamshy-aqparat