Qalada úsh qabbaty záýlim úıde turatyn shirigen baılardyń biri ulyn aýylǵa aparyp bir-eki apta bop qaıtypty. Ózinshe kedeılerdiń ómirin kórsetpekshi bolypty. Úıine kelgesin ákesi ulynan surapty: 
– Shaǵyn saıahat unady ma? 
– Iá, árıne! 
– Kedeıler qalaı turatynyn kórdiń be? 
– Álbette! 
– Al, endi shaǵyn saıahattan ne túıdiń, ne baıqadyń? 
– Baıqaǵanym, bizdiń úıde bir ıt, al olarda tórteý. Bizdiń haýyzymyz baqqa deıin ǵana, al olardyń ózen-kólderiniń sheti-qıyry joq. Bizdiń aýlada túnde muhıt asyp kelgen shamdar janyp turady, al olardyń baqtarynda juldyzdar jarqyraıdy. Bizdiń aýlada serýendeýge bolatyn jer shekteýli, qaqpadan shyǵýǵa bolmaıdy, olarda kóz jetpes jazyq dala bar. Bizdiń úı turǵan jer ólsheýli, olardyń jeri kókjıekpen talasyp tur. Biz tamaqtyń barlyǵyn satyp alamyz, olarda azyq-túliktiń barlyǵy ózderiniki. Bizdiń úıdi úlken tas qorshap, qorǵap tur, olardy jan-jaǵynan dostary qorshap júredi. Áke biz rasymen kedeı ekenbiz ǵoı?! 
Ákesi bul jaýaptarǵa ań-tań qalypty.