Batys Qazaqstan oblys ákimi Altaı Kólginov Aqjaıyq aýdanyna barǵan is saparynda «Batys Marka Lamb» JSHS mekemesine de jolaı soǵyp, jumystyń jaı-kúıimen tanysty.
Aqjaıyq aýdanynda ornalasqan mekemeniń jumysy týraly aksıonerlerdiń biri Raqymjan Smaǵululy baıandady. Onyń málimetinshe, atalǵan seriktestik Irandaǵy et ónimi boıynsha eń iri «Sanaıe» kompanıasymen kelisimshart jasasqan.
– Dál búgin 18 tonna jańa soıylǵan baǵlan qozy etin daıyndap, Irannyń astanasyna jóneltkeli otyrmyz. Et ónimin tıegen júk kólikteri halyqaralyq Aqtaý áýejaıyna baǵyt alady. Áýejaıdaǵy alǵashqy reıspen Tegeranǵa jetkiziledi. Bul – bizdiń Iranǵa etti tuńǵysh ret eksportqa shyǵarýymyz. Irandyq áriptesterimizben jasasqan kelisimshart boıynsha aldaǵy bir jyl ishinde 1500 tonna qozy etin jetkizýimiz kerek. «Sanaıe» kompanıasynyń basshylyǵy etti aptasyna úsh ret jóneltýimizdi talap etip otyr. Buǵan biz de tehnıkalyq turǵydan daıynbyz, - deıdi Raqymjan Smaǵululy.
Negizinen halyqaralyq naryqqa, ıaǵnı óniminiń basym bóligin shetelge ótkizýge baǵyttalǵan «Batys Marka Lamb» búginde etti turaqty túrde Reseıge jetkizip otyr. Sonymen qatar Qytaı Halyq Respýblıkasymen uzaq merzimdik kelisimsharttar júrgizýde. Mamandardyń aıtýynsha, kúzdiń alǵashqy aılarynda aspan asty eline eksporttaýdy bastap ketýleri ábden yqtımal. Bes gektar aýmaqty alyp jatqan óndiristik keshende bári de tolyǵymen avtomattandyrylǵan. Mal soıý jáne et óńdeý jelisinde qoı soıýdan bastap et óńdeýge deıingi joǵary tehnologıalyq talaptar saqtalady. Aýysymyna 1400 bas qoı soıylady. Daıyn ónim tapsyrys berýshige tońazytylǵan tóshke nemese jiliktelip, qorapqa salynǵan kúıinde jetkiziledi. Búginde muzdatylǵan, ıaǵnı ábden qatyrylǵan etten góri tońazytylǵan etke suranys joǵary. Óıtkeni mundaı et óziniń paıdaly qasıetteri men dárýmenderin joımaıdy. Osyndaı artyqshylyqtaryna sheteldikter qyzyǵýshylyq tanytyp otyr. Sondaı-aq ırandyq kompanıanyń basshysy Hadı Hadadze et óniminiń «Halal» standartyna saı óndirilýin jeke qadaǵalaýyna alǵan.
– Esterińizde bolsa, budan biraz ýaqyt buryn Iran eline bir top delegasıa barǵan edik. Sol saparymyzda joǵaryda atalǵan ırandyq beldi kompanıamen kelisimge kelgen bolatynbyz. Árıne, buǵan Elbasynyń Iranǵa baryp, sol eldiń basshylyǵymen kezdesýi, sonyń nátıjesinde eki el arasyndaǵy qatynastyń odan ári bekýi sebep boldy. Ekinshi jaǵynan, bizdegi mal sharýashylyǵy jaqsy damyǵan. Et ónimderimiz ekologıalyq taza, sapaly. Jyl boıyna aýqymdy jumystar atqaryp, endi alǵashqy ónimdi jóneltkeli otyrmyz. Bastysy, turaqty áriptesterimiz bar. Bul – óńirimizdegi sharýa qojalyqtary úshin úlken múmkindik. Endi otandyq ónimdi shetelderge turaqty eksporttaý úshin barlyq tıisti sharalardy uıymdastyryp, jan-jaqty qoldaý kórsetetin bolamyz, – dedi BAQ ókilderine bergen shaǵyn suhbatynda óńir basshysy Altaı Kólginov.
