El birinshiliginde óner kórsetetin almatalyq "Qaırattyń" jańa bas bapkeri bolyp ıspanıalyq maman Karlos Alos Ferrer taǵaıyndaldy, dep habarlaıdy  Qamshy.kz aqparat agenttigi Vesti.kz málimetine súıenip.

Ferrerdiń taǵaıyndalǵany týraly klýb basshysy Qaırat Boranbaev óziniń Instagram jelisindegi paraqshasynda habarlady. Ispanıalyq maman "Qaırattyń" tizginin maýsymnyń sońyna deıin ustaıtyn bolady.

"Bizdiń klýb Karlospen birneshe ýaqyt boıy jaqsy qarym-qatynasta bolyp keldi. Negizi biz ony jyldyń sońynda komandamyzǵa shaqyrǵymyz kelgen. Biraq klýbta bolǵan sońǵy jaǵdaılarǵa baılanysty biz bul mamandy qazir shaqyrtýǵa májbúr boldyq. Kelisimshart jyl sońyna deıin jasaldy. Bizdiń jaǵdaıymyzdy túsinip, Ferrerdi Qazaqstan jastar quramasynda qyzmetinen bosatyp, bizge kómekteskeni úshin Qazaqstan fýtbol federasıasyna alǵys bilediremiz. Barlyǵymyzǵa sáttilik tileımin!", - dedi Boranbaev.

42 jastaǵy Ferrer Qazaqstanda 2015 jyldan beri qyzmet etip keledi. Ol Shymkenttegi "Ońtústik" akademıasynda eki jyl jumys istep, Qazaqstan jasóspirimder quramasyn baptap kelgen edi. Qazaqstanǵa deıin ol Ispanıa, Gonkong jáne Polshada jastar men jasóspirimder akademıalarynda jumys istegen.

Ispanıalyq maman karerasynda tek bir ret qana kásipqoı fýtbol klýbynyń bapkeri bolǵan. 2015 jyldyń qańtary men mamyry aralyǵynda "Pogon Sedlse" tizginin ustap, bar bolǵany on kezdesý ótkizgen.

Eske salaıyq, 21 shildede grýzın maman Kahaber Shadadze qyzmetinen ketkennen keıin "Qaırat" klýby bas bapkersiz qalǵan edi.