Jaz bastalǵaly Úndistanda sý tasqynynan 182 adam kóz jumǵan. Tabıǵı apattan eldiń batysyndaǵy Gýdjarat shtaty asa qatty japa shekken. Marqumdardyń kóbi – osy shtattyń turǵyny. Munda 36 myń adam evakýasıalanyp, ýaqytsha ortalyqtardy panalaýǵa májbúr. Negizi eldiń biraz aýdanyn topan sý basýyna tolassyz jaýǵan jańbyr sebep bolǵan. Osy rette Úndistan Premer-mınıstri bul óńirlerge 77 mıllıon AQSH dollary bólinetinin aıtty, dep jazady Qamshy.kz aqparat agenttigi sheteldik BAQ málimetine súıenip.
Sondaı-aq qurbandardyń jaqyndary men japa shekkenderge ótemaqy tólenetinin de málimdedi. Aıta ketken jón, byltyr Úndistanda tabıǵı apattar men aýa raıynyń qolaısyzdyǵynan 1 myń 600 adamnyń ajaly jetken. Marqumdardyń kóbi aptap ystyqtan kóz jumǵan. Sondaı-aq topan sý men naızaǵaıdan baqılyq bolǵandar az emes.
