Qazaqstanda azamattarǵa dinı máseleler boıynsha onlaın-keńes beretin «Qaýyrt jeli 114» - www.114.kz saıty iske qosyldy dep habarlaıdy Qamshy.kz aqparat agenttigi.
«Qaýyrt jeli 114» Din isteri jáne azamattyq qoǵam mınıstrliginiń qoldaýymen dinderdi zertteý ortalyǵy qaýymdastyǵymen birlesip júzege asyrylýda. Joba azamattarǵa dinı máseleler boıynsha kásibı jáne ýaqytyly kómek kórsete alady.
Mamandar telefon arqyly jáne saıttyń onlaın rejıminde turǵyndardyń dinge qatysty saýaldaryna jaýap berip, destrýktıvtik dinı aǵymdardan zardap shekkenderge psıhologıalyq qoldaý kórsetedi. Konsýltasıalyq keńes qazaq jáne orys tilderinde júredi.
«Qaýyrt jeli 114» saıtynda memlekettik dinı saıasat boıynsha ózekti aqparattar, dinı qatynastarǵa arnalǵan maqalalar men suhbattar, sarapshylar pikirleri jarıalanǵan.
«Qaýyrt jeli 114» - Qazaqstanda ǵana emes, TMD keńistiginde júzege asyrylyp otyrǵan biregeı bastama sanalady.
Aıta keteıik, sońǵy úsh aıda (2017 jylǵy 1 sáýir men 31 maýsym aralyǵynda) «Qaýyrt jeli 114» mamandaryna azamattardan 144 ótinish kelip tústi. Eń kóp ótinishter men shaǵymdar Qaraǵandy, Almaty, Ońtústik Qazaqstan jáne Aqtóbe oblystarynan kelip túsken.
Mamandar habarlasqan azamattar ishinde ıslam máselelerine qatysty saýaldardyń eki esege óskenin aıtyp otyr. Kópshiligi hıdjab jáne oramal taǵý, namaz oqý, Oraza ustaý jáne ıslamdaǵy ajyrasý máseleleri boıynsha aqparat bilgisi keledi.
Eske sala keteıik, keńes berý tegin ári qupıa túrde júredi. Qońyraýlar qalalyq telefonynan «114» nómerin terý arqyly qabyldanady. Oǵan qosymsha qońyraýlar men habarlamalar WhatsApp nómeri arqyly: +7 777 0000 114, sondaı-aq, www.114.kz. saıtynda onlaın túrde qabyldanady.
