Elordalyq ákimdikte Áset Isekeshevtiń basshylyǵymen jıyn ótti, onyń aıasynda qalanyń tirshilik qaraketterine qatysty birqatar máseleler talqylandy, dep habarlaıdy Qamshy.kz aqparat agenttigi qala ákimdigine silteme jasap.

Qala ákiminiń orynbasary Malıka Bekturova memlekettik-jeke seriktestik jobalarynyń iske asýy  jáne Smart-sıtı jobasy týraly aıtyp berdi.

Sondaı-aq qoǵamdyq densaýlyq saqtaý departamentiniń basshysy Nurqan Sádýaqasov jańa oqý jyly qarsańynda bilim mekemeleriniń daıyndyǵy týraly baıandady.

Kún tártibinde kelesi taqyryptar boıynsha máseleler qarastyryldy: turǵyn úı qurylysynda úleskerlikpen salý máselesi, qaladaǵy tirshilik qareketiniń nysandary, qalada qaýipsizdikti jáne jedel áreket etýdi qamtamyz etý máseleleri, búdjet qarajatynyń ıgerilýi, azyq-túlik baǵasy, TKSH salasynda jańa tetikter.

«Sońǵy ýaqytta túngi ýaqytta oryn alatyn shý jáne kóshedegi urys-tóbeles jóninde shaǵymdar kóbeıip ketti. Osyǵan baılanysty qalalyq İİD jáne JPQ oıyn-saýyq mekemelerge qatysty baqylaýdy kúsheıtý kerek»,- dedi Áset Isekeshev.

Oǵan qosa ákimniń orynbasary Qosman Aıtmuhambetov qala basshysynyń tapsyrmasy boıynsha tótenshe jaǵdaılar departamentimen birlese otyryp órt qaýipsizdigi máselelerine qatysty «Highvill» TK-de tekserý jumystaryn uıymdastyrýda.

Sondaı-aq Áset Isekeshev qoǵamdyq kólikte júrý týraly hattamalyq tapsyrma berdi.

«Elordalyq ákimdiktiń basshylary, ákimnen bastap, aýdan ákimderi, orynbasarlar, onymen birge basqarma, qalalyq vedomstvo jáne qurylymdyq bólimshelerdiń basshylary aptasyna bir ret qoǵamdyq kólikte júrýleri tıis», - dedi qala basshysy.

Jıyn qorytyndysy boıynsha ákim elordalyq İİD basshysyna qoǵamdyq tynyshtyqty saqtaýda qaýipsizdik sharalaryn kúsheıtý qajettiligi jóninde tapsyrma berdi.