Ortalyq komýnıkasıalar qyzmetinde Halyqaralyq gepatıtpen kúres kúniniń aıasynda júrgizilip otyrǵan Qazaqstan men álemdegi gepatıt máselesine arnalǵan baspasóz konferensıa ótti dep habarlaıdy Qamshy.kz aqparat agenttigi. Konferensıaǵa QR Densaýlyq saqtaý mınıstrligi medısınalyq kómekti uıymdastyrý departamentiniń áleýmettik mańyzdy aýrýlar kezinde medısınalyq kómek kórsetý basqarmasy basshysy Gúlnár SÁRSENBAEVA, UOTǴO profesory, medısına ǵylymdarynyń doktory, baýyrdy zertteý boıynsha Eýropalyq qaýymdastyqtyń múshesi, “International HepatoTransplantGroup” Qaýymdastyǵynyń prezıdenti Kúlpásh QALIASQAROVA, Ulttyq onkologıa men transplantologıa ǵylymı ortalyǵynyń gepatologıa jáne gastroenterologıa bóliminiń meńgerýshisi, m.ǵ.k Qaharman ESMEMBETOV, "AGEP'C" QF dırektory Sergeı BIRÚKOV qatysty.

Jyl saıyn 28 shildede álemniń kóptegen elderi gepatıtpen kúres kúnin atap ótedi (World Hepatitis Day). Bul kún V gepatıtiniń vırýsyn ashqany úshin Nobel syılyǵynyń laýreaty bolǵan amerıkalyq dáriger Barýh Blambergtiń týǵan kúni. Eń alǵash bul kún Halyqaralyq gepatıtke qarsy alánstyń qoldaýymen 2008 jyly atap ótildi. 2011 jyly Búkilálemdik densaýlyq saqtaý uıymy (DDU) osy kúndi óz kúntizbesine engizip, Halyqaralyq gepatıtpen kúres kúni resmı dárejege ıe boldy. DDU atalmysh kúnde álem dárigerlerin halyq arasynda aǵartý jumystaryn júrgizip, gepatıt týraly jáne onyń asqynýynan bolatyn aýrýlar týraly aıtýǵa shaqyrady. Sebebi aldyn alý sharalarynyń, onyń ishinde dıagnostıkalyq tekserýler men gepatıtke qarsy ekpelerdiń mańyzy zor.

Vırýsty gepatıtter adam densaýlyǵyna áser etetin negizgi qaýip-qater faktorlarynyń biri bolyp sanalady. DUU málimetteri boıynsha, gepatıt vırýsy álemde 2 mıllıardqa jýyq adamǵa juqqan. Bul ǵalamshardyń árbir úshinshi turǵyny. Adamdarǵa aldyn-alý is-sharalary jaıly aıtyp, aqparattyq   materıaldar taratyp jáne kúmándi is-áreketten aýlaq bolýǵa shaqyramyz.

Sondyqtan halyqaralyq gepatıtpen kúres kúni eń aldymen qalyń jurtshylyq pen mamandardyń nazaryn osy máselege aýdarýǵa, árbir eldiń azamatyn gepatıttiń aldyn-alý sharalaryn jasatýǵa shaqyrýǵa baǵyttalǵan.