Altaı taýlary mańyndaǵy Berel qorymynan taǵy bir Altyn adam tabyldy, dep habarlaıdy Qamshy.kz aqparat agenttigi. Bul týraly «Sakraldy Qazaqstan» ǵylymı-zertteý ortalyǵynyń basshysy, saıasattanýshy Berik Ábiǵalıuly óziniń Feısbýk paraqshasynda málim etti.

«Súıinshi, aǵaıyn! Taǵy da kóne dáýirdiń kózindeı bolǵan qundy jádiger! Saq dáýirine tán túrli dúnıeni búginge bútindeı jetkizgen Altaı taýlary mańyndaǵy Berel qorymynan, Zeınolla Samashev bastaǵan ekspedısıalyq toptyń qazba jumystary nátıjesinde taǵy bir Altyn adam tabyldy. «Qasıetti Qazaqstan» baǵdarlamasy aıasynda Shyǵys Qazaqstan oblysyna is-saparǵa baryp, osyndaı aıtýly jańalyqqa kýá boldym», - dep jazdy qoǵam qaıratkeri óz paraqshasyna.

Buǵan deıin arheolog, tarıh ǵylymdarynyń doktory Zeınolla Samashev bastaǵan ekspedısıalyq top birneshe qazba jumystaryn jasap, sátti nátıjelerge qol jetkizip keledi.