Reseı prezıdenti Vladımır Pýtın kezekti prezıdenttik saılaýǵa túsý-túspeýi jóninde oılanyp júrgenin málimdedi, dep jazady Qamshy.kz aqparat agenttigi. 2000 jyldan beri Reseı prezıdenti bolǵan Pýtın 2008-2012 jyldar aralyǵynda premer-mınıstr bolyp, bılik taǵyna qaıta kelgen. Kópshilik Pýtınniń taǵy da prezıdenttik saılaýǵa túsip, memleketti basqarǵanyn qalaıtyn kórinedi.

Býrátıa respýblıkasy men Irkýtsk oblystaryndaǵy orman órtterin joıý barysy jaıynda ótkizilgen jıynda prezıdenttiń aldynda órt saldarynan úıi japa shekken turǵyn sóıledi.

«Bizdiń sizge ótinishimiz bar – kelesi prezıdenttik saılaýǵa sizdiń de qatysqanyńyzdy, saılaýǵa túskenińizdi qalaımyz», - dedi jergilikti turǵyn.

«Jaqsy, oılanyp kóreıin, rahmet», - dep jaýap berdi Pýtın.

Budan buryn «Birikken Reseı» partıasy prezıdenttik saılaýda Pýtındi qoldaıtyndaryn málimdegen.

Al memleket basshysy kezekti saılaýǵa túser-túspesin áli de oılanyp júrgen kórinedi. Sondaı-aq, Pýtın saılaý kampanıasynyń Konstıtýsıaǵa sáıkes qatań túrde ótýin qadaǵalaıtynyn aıtqan.

Aıta keteıik, Reseıde prezıdenttik saılaý 2018 jyly ótedi. Saılaýǵa túsý josparlary jóninde Lıberaldy-demokratıalyq partıasynyń basshysy Vladımır Jırınovskıı málimdedi. «Iabloko» partıasy óz kezeginde úmitker retinde Grıgorıı Iavlınskııdi usynbaq.