Báıgeniń alǵashqy jaýaptary(Tolyǵyraq: http://qamshy.kz/?p=16377)

Nurlan Sádir:

Jyldaǵydaı toılady, alaıda bıyl Qazaqstan Respýblıkasy degen  atpen qatar «Qazaq eli» degen jylylaý hám jumyrlaý sóz tirkesi kóp qoldanyldy. «Shúkir» dep qoıaıyq. Búkil Qazaqstandy qaıdam, bizdiń Oralda bıyl táýelsizdik merekesiniń ústinen «qashan bitesiń/ketesiń?!» degendeı shyrsha tónip turmady, shyrsha Táýelsizdik kúnine deıin tigilgen joq. Ol da bolsa kóńilge demeý. Bıylǵy Táýelsizdik kúni Evrazıalyq Odaq kúshine ener aldynda toılanyp otyr, al bolashaq odaqtasymyz qazir óz basymen, dálirek aıtsaq rúblmen áýre. Sondyqtan, «bul odaq bizge opa bere me?!» degen alań toıdyń dýmanyna alańdy da aralastyryp qoıdy. Táýelsizdik merekesi kezinde Astanadaǵy EKSPO qurylysshylarynyń da narazylyǵy zárezap bolyp qalǵan júrekti «zirk» etkizdi. Biraq Qudaı saqtap, polkovnık qoldap shılenis sheshimin tapty. Óz basym, 16 jeltoqsan kúni tańerteń Táýelsizdik jolynda kúresken ata babalarymyz ben zamandastarymyzdyń rýhyna Quran baǵyshtaýdy, búkil memlekettik saltanatty sharalardy sosyn baryp bastaýdy usynamyn. Bul «myna kún meıram emes, eske alý kúni» degen ártúrli (jany joq emes) áńgimelerdiń aldyn alar ma edi. Sóıtip, Táýelsizdik kúni – saıası ustanymyna qaramastan barlyǵymyzdyń derlik basymyzdy biriktiretin ataýly kúnge aınalar ma edi. Jaratqan Iemiz bizdi, endi, Táýelsizdigimizden aıyra kórmesin!

Haziret Ábdilda:    

Qazaq táýelsizdigin keremet toılady. Shyrshasyn jaqty, shampanyn atty. Aıaz ata toptyń basynda júrdi, aq qar hanysha kúlimdep qasynda júrdi. Shyrshanyń basynda kres turdy, ártúrli shyraq siresip turdy. Sóıtse bul «táýelsizdik» emes «1 qańtardyń» daıyndyǵy eken.  «Átteń!» dep 100 qazaq esin jıypty. Alańǵa kelse jaqsylar az, saqshylar kóp eken. Balalardy úreı bılep, qaıtaıyq depti, ákesi «Ánurandy» aıtaıyq depti. Qorqyp qalǵan balasy: «9 mamyr bar ǵoı, áke!» sol kezde «Uly otannyń» merekesin toılaımyz dep qoımapty...

Sóıtip, úıge qaıtypty, «janazaǵa» barǵan kúıde qaıtypty. «Nurly jolmen» kele jatsa, aldynan shyqqan aqsaqal: «Tek qana alǵa, balalar! Álemdegi damyǵan 30 eldiń qataryndamyz, bereke bolsyn, bereke bolsa mereke bolady» dep bata beripti.