Kúıik - terige, keıde tinderge, bulshyq etke jáne súıekterge órt, elektr nemese hımıalyq zattardyń áserinen keletin zıan. Ystyq bý nemese suıyqtyqtyń áserinen de adam kúıip qalýy múmkin. Kúıiktiń aldyn alý, alǵashqy kómek týraly túsindirý jumystary óńirde jıi ótkizilip keledi.
Batys Qazaqstan Oblystyq tótenshe jaǵdaılar departamenti «Apattar medısınalyq ortalyǵy» fılıalynyń feldsheri Zergúl Qurmanǵazıevanyń aıtýynsha, teriniń jáne tinderdiń zaqymdaný dárejesine baılanysty kúıik birneshe túrge bólinedi eken. Birinshi dárejeli kúıikke teriniń betki qabatynyń zaqymdanýy jatady. Birinshi dárejeli kúıikter ystyq kúnge kúıip ketýden nemese qaınaǵan suıyqtyqtyń, ystyq býdyń áseri nátıjesinde de paıda bolady. Al ekinshi dárejeli kúıikter teriniń eki joǵarǵy qabatyna áser etedi. Teri qyzarady, isinedi, jıi kóbiktenedi jáne kóbik paıda bolady. Mundaı kúıikterdiń aýyrýy óte kúshti bolýy múmkin. Eger dene aımaǵynyń jartysynan kóbi zaqymdalǵan bolsa, onda adam ólip ketýi ábden múmkin. Kúıik alty sharshy santımetrden artyq bolsa, dárigerge jolyǵý kerek. Teriniń tereń zaqymdanýy, tinderdiń bulshyq etterdiń, súıektiń , nervterdiń zaqymdanýy úshinshi dárejeli kúıikke jatady. Bul kúıikter óte aýyr jáne aýyrsynýy da qatty bolady. Úshinshi dárejeli kúıikten soń denede tyrtyqtar qalýy múmkin. Mamannyń aıtýynsha kúıik dárejeleri oryn alǵanda alǵashqy medısınalyq kómek kórsetýdiń mańyzy zor. Infeksıany boldyrmaý úshin aseptıkalyq tańǵyshtardy qoldanyp, shoktyń aldyn alý kerek. Sondaı-aq kúıgen kıimderdi sóndirip, ony adam ústinen sheshý qajet.Kúıip denege jabysyp qalǵan kıimdi jyrtyp alýǵa bolmaıdy, jaraqattyń ústindegisin qaldyryp, aınalasyndaǵysyn ǵana jyrtyp alyp tastaý kerek. Eger syrtta sýyq mezgil bolsa, onda kıim-keshekti jábirlenýshiden sheshý qaýipti, bul shoktyń paıda bolýyna jáne jaǵdaıdyń nasharlaýyna ákeledi eken. Alǵashqy kómek kórsetetin adam kúıgen jerlerge ınfeksıalardyń túsýin aldyn alý úshin qurǵaq aseptıkalyq tańǵyshtardy qoldaný mańyzdy.
Gúlim AQAP,
Batys Qazaqstan oblysy
