«Ákem jaýdan qaıtpaǵan, sheshem shaıdan» demekshi, bizdiń paıymymyzsha da álige shaıdan qaıtqan qazaq joq. Bul oıdyń ózin qashanǵy bir ádetimizshe qyzyl shaıdan qybymyz qanyp, soraptap otyrǵanda oılaıtynymyz – taǵy shyndyq! Sosyn ǵoı, sosyn osy bir sýsyn jaıly sheshilip kep, kósile sóılep otyrǵanymyz.
Shaıdy aıtpaqshy, qasqyrdan keıin et bitkenge esi ketetin qazaqtyń shartarapqa «shaıshyl» aty da eptep tanyla bastaǵanǵa uqsańqyraıdy. Olaı deıtinimiz: «Bigpicture.ru» saıtynyń sala qulash reıtıngisi Qazaqstandy shaı tutynýy eń kóp on eldiń qataryna qosyp qoıdy («qosyp qoıdy» deıtinimiz: statısıka ataýlyǵa senimniń ketken sıqy ǵana – red.).
Meıli, ne dese de, qýanasyń! Aty shyqpaı jer órtep júrgen elderge qaraısyń da «táýbá, táýbá!» deısiń kelip-kelip! Onyń ber jaǵynda «ishý» degen qandaı tamasha estiledi deseńizshi?! «Oıbaı, oıbaı! İshkenniń nesi jaqsy?» deısiz be? Bul kúnde iship qulaǵan, «jep» qulaǵannan ájeptáýir jaqsy qylyq bolyp turǵan joq pa, táıiri?!
Nanbasańyz, keshe ǵana Nazarbaevtyń aldynda zyr júgirip, ol kisiniń emes-aý, halqynyń aldynda zyr júgirip júrgen Ahmetovtyń jylqy jylynda nakaýtqa ketýi: quryp qalǵyr, «jegennen» desedi! Áıteýir, qylmys ústinde bura tartqyzbaı kózben kórip, qolymen ustamaǵasyn, «jepti» degen sózden halyq túgel jerı qoımady. Onyń ústine, Sekeńniń jegende de bireý-mireýdiń ǵana nervysyn jep ketkenin, qońyr tóbel qazaq taǵy ishteı bilip júrdi..?
Kórdińiz be? «Jeý» degen tegi qandaı jaman sózge aınalǵan. Bolmasa, jurt bitken jegenniń jelkesine minip: «jemenqor» demes pe edi, kim bilsin?! Zamanynda «İship-jep» dep, «ishý» sózimen qosarlana táp-táýir aıtylsa da, bul kúnde eki sózdiń arasyn jalǵaý – eki eldiń arasyn jalǵaýdan da aýyr bop tur. Óıtkeni, halyqtyń «qalaýly» degen depýtaty qaltasyn qaǵyp, qarjysyn jese, al sol depýtat ataýlynyń áıdik opozısıa «Qanyn qaqtap iship» boldy emes pe?
P.S.: Mine, osy sebepti de, bizdiń qoǵamda «jegenniń» jyryn qashanda «ishken» aıtady!
Qozybaı QURMAN
