Qazir alqaly toptyń ornyn áleýmettik jeli almastyrdy. Burynǵy Kúltóbeniń basynda kúnde jıynnyń jınaqy nusqasy osy - Facebook. Keshegi bılershe kesim aıtar kósem de, shymyr oıly sheshen de osynda. Facebook-tiń ózge ózi turǵylas áleýmettik jelilerden artyqshylyǵy munda salmaqty oılar aıtyp, salmaqty adamdar otyrady. Tanymal tulǵańyzben hat jazysyp, emin-erkin pikir almasa alasyz. Jazýshy da, jazarman da, shabarman da, ánshi de, bıshi de bári osynda. Olardyń jeke ómirlerindegi jańalyqtary men shyǵarmashylyq jetistikteri jazbalarda jarıalanyp tileýlestigimizdi «laıkpen» bildirip jatamyz.
Qazir osy Facebook qoldanýshylarynyń árqaısysy shtattan tys habarshy qyzmetinde. Jańalyq taratýdan aqparattyq agenttikterdiń aldyn orap ketemiz. Jańa kitaptyń tusaýkeseri bolsyn, mereıtoı bolsyn, jeke án keshterdiń jarnamasyn jasap, qonaqqa shaqyryp, dostarymen bólisip jatqanymyz... Quba-qup. Bir ǵalymnyń mereıtoıyn, belgili tulǵalardyń kezekti marapat ıesi atanǵanyn burynyraq aıtyp, bir-birimizden laık tilep otyrǵanymyz... Durys ta shyǵar. Jazǵan jazbamyzdyń jaǵdaıyn, jaǵalaı qoıylǵan «laıkpen» ólsheıtin boldyq. Endi myna qyzyqty qarańyz. Ómir bar jerde ólim bar. Qazir qazanamany da osy jelide jazba arqyly taratatyn boldyq. Bir jaǵynan tıimdi tustary da joq emes. Barlyǵyna qońyraý shalyp estirtip jatqannan, jazbaǵa jarıalasańyz ózin «jaqynymyn» dep tapqan ár kisi kóńil aıtyp, sadaqasyna jıylady.
Bir túsinbeıtinim, qazanamany jetkizip, kóńil aıtar lebiz bildirgenimizde shekten tys «laıktyń» astynda qalatynymyz. Sonda qalaı, qýanyshta qoldanylar sezim men qaıǵyda qaıtar kóńildiń ara jigin ajyrata almaı qalǵanymyz ba? Qaıǵydan qan jutpasaq ta ólimine «unaıdy» túımesin basatynymyz qalaı? Qazaq týysy túgil qaımana bireýdiń qazasyna kóńil aıtyp, kóz jasyn bir syǵyp almaýshy ma edi? Álde qaı tulǵanyń tirliginde qadirli bolǵanyn qazanamanyń astyna qoıylǵan «laıkpen» ólsheımiz be? Qaza turǵysynda habary azdaý bireýdiń tirligi shyǵar deseń, alǵashqy «laıkti» keıde aqyl aıtar aǵalardyń ózi basatyny tosyrqatyp tastaıdy. Qoıshy,ne kerek qazaǵa qýanatyn qazaqty da Facebook-ten kórdik.
Orynbasar Baqytbek
