Ońtústik Koreıada jyl saıyn elde tynyshtyq ornaıtyn ýaqyt bolady. Elektrıchkalar ýaqytsha toqtaıdy, bırja saýdany keıinge shegeredi, ushaqtarǵa ushyp, qonýǵa tyıym salynady.
Sebebi bul kúni oqýshylar emtıhan tapsyrady dep jazady Qamshy.kz aqparat agenttigi BBC-ge silteme jasap. Dál osy kúni oqýshylardyń taǵdyry sheshiledi. Eger emtıhandy jaqsy tapsyrsa eldiń eń ozyq ýnıversıtetteriniń birinde oqı alady. Bul – sapaly bilim alyp, bolashaqta mol qarajat tabýǵa jol ashady.
Osy jyly biryńǵaı test 16-shy qarashada ótý kerek bolǵan. Alaıda jer silkinisi saldarynan ol bir aptaǵa shegerildi. Aıta keteıik, magnıtýdasy 5,4 jer silkinisi Koreıanyń ońtústik-shyǵys bóliginde boldy.
Tarıhta alǵash ret test ýaqyty tótenshe jaǵdaıǵa baılanysty keıinge shegerilgen. Bilim jáne ǵylym mınıstrligi jer silkinisi bolǵan jerdegi mektepte otyrý qaýipti dep sheshken.
Ádette bılik jer silkinisi bolmaı-aq emtıhan ýaqytynda oqýshylar úshin barlyq jaǵdaıdy jasaıdy. Eldiń barlyq memlekettik mekemesi bul kúnderi erekshe rejımde jumys isteıdi.
Ońtústik Koreıadaǵy test álemdegi eń qatal emtıhan bolyp sanalady. Oqýshylar bir kúnde barlyq pánnen emtıhan tapsyrady.
Emtıhan – túlekterdiń bolashaǵyn sheshedi
24-shi qarashada 593 myń oqýshy 1180 emtıhan ótkizetin ortalyqqa keldi. Árqaısysy tamaq, jylý, qaýipsizdik jáne tynyshtyqty qamtamasyz etý kerek.
Emtıhan ýaqytyndaǵy eń radıkaldy shara – ushaqtardyń tótenshe jaǵdaıdan tys ushýǵa jáne qonýǵa tyıym salynýy. Oqýshylar aýdıo tyńdaǵan 35 mınýtta elde tolyq tynyshtyq ornaıdy.
Kólik mınıstrliginiń buıryǵymen osy ýaqytta áýede bolǵan ushaqtar áýeden jerge 3 shaqyrymǵa tómendeýge tyıym salyndy.
Seýl NOTAM (Notice to Airmen) júıesi arqyly barlyq áýe kompanıalaryn shekteý týraly eskertedi.
Emtıhan tapsyrmalaryn qalaı qupıada ustaıdy?
Jyl saıyn test suraqtaryn daıyndaıtyndardy ýaqytsha syrtqy álemnen oqshaýlaıdy. Emtıhan suraqtary daıyndalyp jatqan ǵımarat qatań qupıada saqtalady. Tapsyrmany daıyndaǵandarǵa qyzmet kórsetetinder de ǵımarattan shyǵarylmaıdy.
Aqparat jarıa bolmaýy úshin, test tapsyrmalary daıyndalyp jatqan ǵımaratta barlyq komýnıkasıa quraly óshiriledi. Ǵımarattan tek tótenshe jaǵdaıda ǵana shyǵýǵa bolady. Máselen, jaqyny qaıtys bolǵanda. Tipti eden jýýshylarǵa deıin ǵımarattan shyǵýǵa ruqsat berilmeıdi. Jerleý rásimine barǵannyń ózinde ony arnaıy agentter aparyp, ákeledi.
Osy jyly emtıhan suraqtaryn daıyndaý 13-shi qazanda bastaldy. Ony 700 adam daıyndady. Biryńǵaı test 16-shy qarashada ótedi dep josparlanǵandyqtan, 700 adam sol kúni bostandyqqa shyǵamyz dep úmittengen. Jer silkinisine baılanysty, emtıhan bir aptaǵa shegerilgendikten olar 1 apta qamaýda bolýǵa májbúr.
Oqýshylar test tapsyrǵanda oqýshylardyń qaýipsizdigin on myń polıseı men órt sóndirýshi qorǵaıdy.
Mektep oqýshylarynyń biri qujattaryn umytyp ketken jaǵdaıdy ony jedel túrde úıine jetkizip, alyp keletin arnaıy kólikter bólinedi.
Osy jyly 18 myńnan astam polısıa test tapsyrý ortalyqtaryn kúzetti. Sonymen qatar, tótenshe jaǵdaı bolǵan jaǵdaıda arnaıy jasaq ta oqýshylar qaýipsizdigi úshin daıyn turdy.
Jer silkinisi bolǵan aýdandarda tabıǵat apaty qaıtalanǵan jaǵdaıda oqýshylarǵa kómek kórsetý úshin sarbazdar men dárigerler jasaqtaldy.
Seýl ákimshiligi qoǵamdyq kólikterdiń ádettegi ýaqyttan erte shyǵýǵa buıryq berdi. Bul oqýshylardyń emtıhan tapsyratyn orynǵa ýaqytyly jetý úshin jasaldy. Qosymsha taksı men jeke kólikter de jumys istedi.
Tipti KOSPI ındeksi boıynsha 1,6 trıllıon AQSH dollaryn saýdalaıtyn Koreıanyń qor bırjasy da saýdany bir saǵatqa kesh bastady.
Koreıanyń bank federasıasy tań erteń qoǵamdyq kólikte balalaryn shyǵaryp salatyn ata-ana men muǵalimderdiń kóp bolatynyn eskerip, jumys kúnin 9-dan 10-ǵa aýystyrdy. Basqa da jekemenshik mekemeler dál solaı istedi.
