Almaty ákimi Baýyrjan Baıbek kereńderdiń Halyqaralyq sport komıtetiniń prezıdenti Valerıı Rýhledevpen kezdesti. Taraptar qalada 2019 jyly qysqy XIX Sýrdlımpıada oıyndaryn ótkizý múmkindikterin talqylady, dep habarlaıdy Qamshy.kz aqparat agenttigi Almaty qalasy ákimdiginiń málimetine súıenip.
Lozannadan delegasıamen birge kelgen Valerıı Rýhledev qalada qysqy sport túrleri, sonyń ishinde Sýrdlımpıada oıyndaryn ótkizý boıynsha qajetti ınfraqurylymdardyń bar ekenin jáne sol arqyly múmkindigi shekteýli jandardy buqaralyq sportqa keńinen tartýǵa bolatyndyǵyn aıtty.
«Biz Almaty qalasynda salynǵan tamasha sport ınfraqurylymymen tanystyq. Nysandardyń sáýleti jáne zamanaýı standartqa saı jabdyqtalǵany ǵana emes, obektilerdiń ishin toltyrǵan belsendi sporttyq ómir de tánti etti. Biz kerlıng pen taý shańyǵysy boıynsha ótken respýblıkalyq jarystardy, balalardyń mánerlep syrǵanaý men hokeı oınaý barysyndaǵy jattyǵýlaryn, sonymen qatar konkıı men shańǵydan jappaı syrǵanaý sıaqty sharalardy kórdik. Osynyń barlyǵy jáne óte joǵary deńgeıde ótken 28-shi Búkilálemdik qysqy Ýnıversıada búgingi kúni Almatynyń álemdik qysqy sport ortalyǵy ekenin dáleldeıdi», - dep atap ótti ol.
Onyń aıtýynsha, Sýrdlımpıadalar oıyn ótetin qalalardyń qoǵamdyq keńistigin jasqartady. Múmkindigi shekteýli jandar úshi arnaıy pandýstar, lıftar, trotýarlar, baǵdarshamdar paıda bolady nemese burynnan barlary qaıta jańǵyrady, arnaıy belgiler, vızýaldy kórsetkishter jáne kóptegen basqalary ornatylady.
«Kereńderdiń Halyqaralyq sport komıtetiniń qurylǵanyna 94 jyl ishinde qysqy Sýrdlımpıada oıyndary Azıa kontınentinde birde – bir ret ótpegen eken. Kóp jyldyq tájirıbeden baıqaǵanymyz, Sýrdlımpıada oıyndary ótken soń múmkindigi shekteýli janjdardyń boıynda deneshynyqtyrý men sportqa degen belsendilik arta túsedi. Oıyndar olardyń erik-jigerin, áleýmettik ómirge degen qyzyǵýshylyǵyn arttyrady. Almatydan ótinim túsken joq, biraq biz qalany osy oıyndardyń bolyp qalýy múmkin astanasy sanaımyz», - dep tolyqtyrdy ol óziniń sózin.
Aıta keterligi, qazirgi kezde qalada 44,1 myń múgedek turady, olardyń 5-myńǵa jýyǵy qulaǵy nashar estıtinder. 2017 jyly múgedekterge áleýmettik kómek retinde 4,1 mlrd. teńge bólindi
Sýrdlımpıada oıyndary – qulaǵy sańyraý adamdardyń sporttyq jarysy, kereńderdiń alǵashqy Búkilálemdik oıyndary 1924 jyly Parıjde ótken bolatyn.
