Memleket basshysy N.Nazarbaevtyń «Tórtinshi ónerkásiptik revolúsıa jaǵdaıyndaǵy damýdyń jańa mindetteri» atty Qazaqstan halqyna jasaǵan Joldaýynda mańyzdy degen on mindetke basymdyq berip otyr. Atap aıtqanda Qazaqstannyń ındýstrıasyn eń jańa tehnologıalardy engizýdiń kóshbasshysyna aınaldyrý, óndiristik úderisterdi sıfrlandyrý arqyly ónerkásiptegi eńbek ónimdiligin arttyrý, resýrstyq áleýetti tıimdi paıdalaný, óndiriske aqparattyq tehnologıalyq sheshimderdi batyl engizý, agroónerkásip keshenin jańa tehnologıalyq deńgeıge kóterý, kólik pen logıstıkalyq ınfraqurylymdy odan ári damytý mindetterin qamtıdy.
Prezıdenttiń jyl saıynǵy Joldaýyn erekshe yqylaspen kútemiz. Ásirese, bizdi bilim salasy týraly aıtqan málimdesi asa qyzyqtyrady. Osy joly da Elbasy Joldaýdyń jetinshi mindetinde bilim berýdiń jańa sapasyna toqtaldy. Ol barlyq jastaǵy azamattardy qamtıtyn bilim berý isinde ózimizdiń ozyq júıemizdi qurýdy jedeldetý qajet ekenin eskertti. Bilim berý baǵdarlamalarynyń negizgi basymdyǵy – ózgeristerge únemi beıim bolý jáne jańa bilimdi meńgerý qabiletin damytý kerektigin aıtyp ótti.
Sonymen qatar jastar máselesi, ásirese, jas ǵalymdardyń áleýmettik jaǵdaıyn arttyrý kerektigi jaıly da Elbasy sóz etti. «Jas ǵalymdarǵa ǵylymı granttar aıasynda kvota bólinip, olardy qoldaýdyń júıeli saıasaty júrgiziledi» dep aıtýynyń mańyzy joǵary. Sebebi HHİ ǵasyr-ǵylym men tehnıkanyń zamany bolǵandyqtan, qazaq jastary zaman kóshinen bir eli qalmaı ǵylymdy damytýǵa bar kúsh-jigerin salýy tıis.
Joldaýda joǵary bilim berý júıesine qatysty kóptegen jańa mindetter aıqyndalyp otyr. Atap aıtqanda bilim berýdiń barlyq deńgeıinde matematıka jáne jaratylystaný ǵylymdaryn oqytý sapasyn kúsheıtý; oqytýdyń mazmundylyǵyna zamanaýı tehnıkalyq turǵydan qoldaý kórsetý arqyly tolyqtyrý; JOO-ǵa sheteldik menedjerlerdi tartyp, álemdik ýnıversıtetterdiń kampýstaryn ashý; ulttyń áleýetin arttyrý úshin mádenıetimiz ben ıdeologıamyzdy odan ári damytý týraly aıtylǵan.
Almaty ýnıversıteti – zaman talabyna saı beıimdelip kele jatqan bilim berý ordasy. Jylyna myńdaǵan túlek bitirip, respýblıkamyzdyń túkpir-túkpirinde elimizdiń kórkeıýine óz úlesterin qosyp júr. Ýnıversıtet bitirgen túlekterdiń bolashaǵyna eshqashan beı-jaı qaraǵan emes. Joldaýda aıtylǵan «jumys berýshilerdi tartý arqyly jáne halyqaralyq talaptar men sıfrlyq daǵdylardy eskere otyryp, tehnıkalyq jáne kásiptik bilim berý baǵdarlamalary jańartylady» jáne «ýnıversıtetterdegi pedagogıkalyq kafedralar men fakúltetterdi damytý» degen Elbasynyń sózderi ýnıversıtetimizdiń odan ári kórkeıýine dem beretini anyq.
Elbasy Joldaýynda aıtylǵan bilim-ǵylym salasyn damytý týraly mindettermeler elimizdegi kez-kelgen joǵarǵy oqý ornyn qanattandyrady. Bizdiń ýnıversıtet ujymy úshin 2018 jyl aıtýly jyl bolmaq. Onyń ózindik sebebi de bar. Jastardy bilim nárimen sýsyndandyryp, tárbıelep otyrǵan ýnıversıtetimizge 20 jyl tolady. Osyǵan oraı Elbasynyń joldaýda aıtylǵan bilim berý úrdisterin jetildirýge, oqý baǵdarlamalaryn jańartýǵa, sıfrlyq ýnıversıtetke kóshýge baǵyttalǵan tapsyrmalaryn oryndaý arqyly jańa mejege jetemiz degen oıdamyz jáne 20 jyldyqqa qosqan erekshe úlesimiz dep bilemiz.
Jalpy elimiz qarqyndy damyp, damyǵan otyz eldiń qataryna jetýdi maqsat etip otyr. Elbasynyń bıylǵy Joldaýy Qazaqstannyń úshinshi jańǵyrýyn jańa belesterge kóterýdiń naqty baǵdarlamasy ekeni aıdan anyq.
Ermaǵanbetov Mýbarak Ermaǵanbetuly,
Almaty ýnıversıtetiniń rektory, hımıa ǵylymdarynyń doktory, profesor
