Áleýmettik jelide synǵa ushyraǵan oqý quralynyń taǵy bir avtory Serikbolsyn Dúısembaı halyqtan keshirim surady. Bul týraly avtor óziniń Facebook-tegi paraqshasynda jazdy, dep habarlaıdy Qamshy.kz aqparat agenttigi.

Nazarbaev zıatkerlik mektebine túsýshilerge arnalǵan test jınaǵynda MS Saılaýbektiń ómirbaıany jazylyp, reper týraly suraq qoıylǵan.  Áleýmettik jeli qoldanýshylary buǵan jappaı narazy bolyp jatyr.

Qamshy.kz aqparat agenttigi kitap avtorlarynyń birine habarlasyp, istiń anyq-qanyǵyna kóz jetkizgen bolatyn. Qazaq tili pániniń muǵalimi Qazbek Saǵıdolda óz sózinde Saılaýbektiń esimi kitapqa baıqaýsyzda enip ketkenin aıtty.

Oqý quralynyń ekinshi avtory, jas ǵalym Serikbolsyn Dúısembaı da qatelik ketkenin moıyndap, kópshilikten keshirim surady. Sonymen qatar ol bir qatelik úshin jastardy synaı jónelgen qazaqtarǵa renish bildirdi.

- Talaı 100 myń danamen shyǵyp júrgen, ishinde qanshama qatelikter órip júrgen oqýlyqtardy da kózimiz kórip júr. Al bizdiń resmı emes, tek emtıhanǵa daıyndyqqa arnalǵan Qazaq tilinen bar-joǵy 100 dana testter jınaǵynyń ishindegi 5-6 jolymyz qanshama balaǵat, ǵaıbat sózderge alyp keldi. Biraq, bul joldar kelesi basylymda aýystyrylyp, túzetilip úlgergen edi. Jáne bul test jınaǵy eshqandaı resmı bekitilmegen, mektep baǵdarlamasyna enbegen.

Men buny aqtalý úshin de, maqtaný úshin de jazyp otyrǵan joqpyn. Tek bizdiń qoǵamnyń keıbir “belsendileri” máseleniń mán-jaıyna baryp almaı, tek alyp-qashpa áńgimege erip, jerden jeti qoıan tapqandaı jarysa bólise ketetininen Álem kóshine ilesýdiń aýyly alys pa dep qaldym.Tıtteı “qateligi” úshin Óz ulyn ózeginen tepkendeı kóringen elge endi oralǵyń da kelmeı qalady eken. Elden keshirim suradym. El úshin "Qurban bolýǵa daıynmyn". Oǵan rýhym jetedi, - dep jazdy Serikbolsyn Dúısembaı óz paraqshasynda.