Áleýmettik jeliden dinge baılanysty ártúrli postty kórip qalasyń. Kóbiniń aqylynan ashýy alda júredi. Ashyp qarasań, álgi jerden sol adamnyń emosıasyn ǵana oqısyń. Ásirese, myna ımamdar men ımandylyq týraly áńgime qozǵala qalsa keıbiriniń jyny qozyp kete me, balaǵattaýǵa deıin baryp jatady ǵoı. Ony kórgen oqyrmandary da otqa maı quıǵandaı bolyp, kommentti qyp-qyzyl talas-tartysqa aınaldyryp jiberedi. Sony jazyp jatqandardyń kóbi dinde álipti taıaq dep tanymaıtyndar, qarap tursań.
Budan bylaı áleýmettik jelidegi osyndaı jaǵymsyz post jazatyndardy jaýapqa tartý jaǵy qarastyrylyp jatyr eken. Áleýmettik jeli aýzyna kelgendi aıtatyn orta emes. Onyń da jazylmaǵan zańy, etıkalyq normalary bar. Osyny túsinbeı, eldiń arasyna jik (búlik) salyp, adamnyń jeke basyna tıisip ketken jańaǵydaı post jazǵandardy ımamdar budan bylaı sotqa bermekshi. Shymshyq soısa da qasapshy soıǵany durys. Sondyqtan, aǵaıyn, mundaı sypsyń sóz ben ósekten aýlaq bolaıyq. Tek júrgen – toq júredi!
Jolymbet Mákish
