Almatyda «Kanıkýl» jedel aldyn alý sharasy barysynda 400-den astam jasóspirim ustaldy.
Almatyda «Kanıkýl» jedel aldyn alý sharasy aıaqtaldy. Qalalyq polıseıler eki apta boıy túngi ýaqytta oıyn klýbtary men oıyn-saýyq oryndaryn tekserip shyqqan. Osy ýaqyt aralyǵynda ınspektorlar aýdandyq İshki ister basqarmasyna ár túrli quqyqbuzýshylyq áreketi úshin 442 jasóspirimdi jetkizgen.
Bul kámelet jasyna tolmaǵan jetkinshekter dostarynyń týǵan kúnin atap ótý úshin jınalypty. Túrli sýsyndardan bólek, dastarhanda ishimdik te qoıylǵan. Bas qosqandardyń arasynda jeteýiniń jasy 18-ge tolmaǵan bolyp shyqty. Al dámhana ákimshisi ádettegideı odan beıhabarmyn dep basyn alyp qashty.
«Men bilgen joqpyn. Qujattaryn teksermedik. Olar keshki saǵat 9-da keldi. Bizden tek tórt sýsyn aldy. Men nege tapsyrys bergenderin kórsete alamyn. Al araqty qalaı alyp kirgenderin bilmeımin», - dedi dámhana ákimshisi Zarına Musaeva.
Inspektorlar jasóspirimderdi Túrksib aýdanynyń İshki ister basqarmasyna jetkizdi. Keıinnen alkotestermen tekserilgen soń, ata-anasy shaqyrtylyp, úıine jiberildi. Olarǵa 7 myń teńgeden asa aıyppul salyndy. Odan bólek, dámhana ıesi de ákimshilik jaýapkershilikke tartylmaq. Osyǵan baılanysty is kámeletke tolmaǵandar isteri jónindegi mamandandyrylǵan aýdanarlyq sotyna joldanady.
Tártip saqshylary kompúter klýbtaryn da tekserdi. Túngi saǵat bir bolǵanyna qaramastan, ınspektorlar oıyn zalynda 13 jasar jetkinshekti kezdestirdi. Ony munda aǵalary ertip ákelgen. Al jetkinshektiń ózi Almatyǵa Túrkistannan apasymen erip kelgen.
Apasy senimhatty kórsetken soń, ınspektorlar balany qolyna tapsyrdy. Degenmen, aıyppul salyndy. Al materıal ıývenaldy sotqa joldandy. Kompúter klýb basshylyǵy da jaýapkershilikke tartylady.
Polıseıler turmys jaǵdaıy tómen otbasylardy da aralady. «Juldyz-1» yqshamaýdanyndaǵy 5 qabatty páterge bas suqty.
Bul úıde úsh balaly otbasy kún keshedi eken. Sonyń biri 11 jastaǵy jetkinshek sabaqty jıi qaldyratyn bolyp shyqty.
«Qolaısyz otbasyǵa baılanysty barlyq jadaǵattar Túrksib aýdandyq balalar quqyǵyn qorǵaý komısıaǵa jiberildi. Aldaǵy ýaqytta biz jumys jasaımyz jáne osy ýaqytqa deıin birneshe profılaktıkalyq shara júrgizilip otyr. Úsh balaǵa qatysty, endi, keleside balanyń oqý orny jáne turǵylyqty ornyn anyqtaıtyn bolamyz», - dedi Almaty qalasy Túrksib aýdandyq İİB aǵa leıtenanty Aıjan Qanatova.
Dónentaev kóshesindegi 4 adam turatyn qýyqtaı úıdiń ishi adam kórgisiz. Tipti olardyń bári mundaı jaǵdaıǵa ashshy sýdyń saldarynan tap bolǵanyn jasyrmaıdy. 32 jastaǵy eki balanyń anasy otbasyny qamtý úshin kólik jýatyn jerde jumys isteımin deıdi.
Kezekti túngi reıd barysynda aýdandyq polısıa basqarmalaryna ata-ananyń qaraýynsyz beısaýat júrgen 70 jasóspirim tústi.
