Almatydaǵy Yqylas atyndaǵy murajaıǵa Qurmanǵazy dombyrasynyń kóshirmesi qoıyldy.

Almatydaǵy Yqylas atyndaǵy halyq mýzykalyq aspaptar murajaıy jańa jádigermen tolyqty. Búgin qazaqtyń uly kúıshi-kompozıtory, aspapty mýzyka óneriniń klassıgi Qurmanǵazy dombyrasynyń kóshirmesi murajaıǵa qoıyldy. Sonymen qatar, kúıshiniń tól shákirti Erǵalı Esjanovtyń da dombyrasy resmı túrde tabystaldy.

Dúldúl dombyrashynyń dara aýyz myltyǵyn murajaıǵa tabystaý kúı keshimen bastaldy. Onda «Qurmanǵazy atyndaǵy akademıalyq halyq aspaptar» orkestriniń dombyrashylar quramy jáne basqa da kúıshiler óner kórsetti. Kúıshiniń shyǵarmalary oryndalyp, ónerpazdar sahnada án shyrqady.

Qurmanǵazy Saǵyrbaıulynyń 200 jyldyq mereıtoıy halyqaralyq IýNESKO aıasynda keńinen toılanyp jatyr. Kıeli dombyranyń kóshirmesi Astrahan oblysy Altynjar aýylyndaǵy Qurmanǵazy atyndaǵy mádenı ortalyq qorynda saqtalyp kelgen. Búgin kúıshi-kompozıtordiń aspabymen birge tól shákirtiniń de dombyrasy murajaıǵa tabystaldy.

Sonymen qatar, Dına Nurpeıisovanyń kamzoly, 19-shy ǵasyrda kıgen shapany men zergerlik buıymdary kórmege qoıyldy. Kesh «Rýhanı jańǵyrý» baǵdarlamasy aıasynda uıymdastyrylǵan.

Almatydaǵy Yqylas atyndaǵy halyq mýzykalyq aspaptar murajaıynda Mahambet, Birjan sal, Súgir, Esbaı, Qazanǵap, Jambyl, Abaı syndy uly tulǵalardyń dombyralary bar. Sońǵy eki jylda murajaıǵa 100-ge jýyq memorıaldy eksponattar alynypty. Onyń ishindegi eń qundysy Aqan seri men Qurmanǵazynyń dombyralary eken.