Almatydaǵy №94 mektepte úziliske jetpeı, dabyl qaǵyldy. Syrtqa umtylǵan oqýshylar qaýipsiz jerge jınaldy. Áıtse de, apat ornynda qalyp qoıǵandary da bar. Olar - kómekke zárý. Bul - jattyǵý sharty bolatyn. Tótenshelikter tálimgerlerge der kezinde kómekke kele aldy ma? Daıyndyǵy qalaı?
Apatty jaǵdaıda qaǵylatyn dabyldy estigen mektep oqýshylary jappaı syrtqa umtyldy. Basyn sómkemen jaýyp alǵan olar birin-biri taptamaı, shapshań dalaǵa shyqty. Áıtse de, keıbir oqýshylar nysannyń ishinen der kezinde shyǵa almaı qaldy. Tótenshelikter ǵımartty tolyqtaı ıtpen tintip, tabylǵandardy 3-shi qabattyń terezesinen túsirdi.
Záre-quty qashqan oqýshylarǵa alǵashqy kómek te der kezinde kórsetildi. Syrtqa shyqqandar top bolyp tura qalyp, synyptastaryn túgeldeı bastady. Qoldaryna jasyl tústi qaǵazdy ustaǵandar ózderiniń túgel ekenin bildirse, qyzyl tústi kórsetkender aralaryna áli de oralmaǵandardyń bar ekenin habar berip turdy. Bul tásil apatty jaǵdaıda aqparat berýdiń eń ońtaıly tásili bolsa kerek.
«Reseı Federasıasynyń Kemerovo qalasynda ótip jatqan oqıǵalar boıynsha, oǵan qosa bizdiń mınıstrdiń buıryǵy boıynsha, Almaty qalasy boıynsha barlyq mekemelerde osyndaı seısmıkalyq oqý-jattyǵýlar jáne órtke qarsy jattyǵýlar júrgizilip jatyr», - dedi Almaty qalasy TJD azamattyq qorǵaý basqarmasynyń aǵa-ofıseri Bekbolat Buǵabaev.
Osylaısha Kemerovodaǵy qabyrǵany qaıystyrǵan qaıǵyly jaǵdaı kópke sabaq boldy. «Saqtyqta qorlyq joq» deıtin mamandar mundaı daıyndyqty udaıy júrgizip jatqandyqtaryn alǵa tartty. Osyndaı jattyǵý jumystary oqýshylardyń mektepten tys ýaqytta da apatty jaǵdaıda qajetine jarap jatqany jeterlik.
«Maqsaty-balalardy daıyndaý, tótenshe jaǵdaı men betpe-bet kezdeskende olardyń qaýipsizdik mádenıetin joǵarylatý. Alataý aýdanynda úıde órt alǵan kezde, 11 jasar danıar Satypaldyuly óziniń jastyǵyna qaramastan, eki qaryndasyn, inisin órtke oranyp jatqan bólmeden shyǵaryp alǵan eken», - dedi Almaty qalasy TJD resmı ókili Sandýǵash Baımuhambetova.
Jan-jaqty qamtylǵan jattyǵý sabaǵy tek Bostandyq aýdanynda ótti. Sharaǵa oqýshylardan bólek, 30-dan astam mektep dırektory men 28 balabaqshanyń meńgerýshisine deıin qatysty. Bul joly kórmegendi kórip, bilmeıtinizdi sanamyzǵa sińirip qaıttyq deıdi olar.
«Jańashyldyǵy ol - mynaý terezeden túsirilip jatyr. Adamdar qutqarylyp jatyr. Sol sátteri qyzyq bolyp jatty. Itpen izdep shyqqandaı. Al biz jalpy 3 qońyraýmen dalaǵa balalardy shyǵarý, stadıonda jınaýdy barlyq mektep biledi», - dedi M.V. Lomonosov atyndaǵy № 38 Qazaqstan-Reseı gımnazıanyń dırektory Gúljan Dosaeva.
Apatttyń aıtyp kelmeıtini aqıqat. Áıtse de, tótenshe jaǵdaıǵa saqadaı saı bolý árbir mekemeniń mindeti. Byltyrǵy daıyndyq boıynsha, Almatydaǵy barlyq bilim oshaǵy men mektepke deıingi bilim berý mekemesindegi tótenshelikterdiń tekserisi, olardyń 100 paıyz apatty jaǵdaıǵa tótep bere alatyndyǵyn anyq degen edi. Endi bıyl mamyr aıyna deıin qaladaǵy barlyq nysandarda seısmojattyǵý jumystary júrgizilmek.
