Almatyda órtengen kópqabatty úı turǵyndaryna aqshalaı kómek kórsetilmek.
Kókjıekte órtke oranǵan páterler az ýaqytta tolyqqandy jóndelip bitýi tıis. Qala ákimi Baýyrjan Baıbek osylaı dep tapsyrma berdi. Qazir oqıǵa orynda tergeý-tekserý jumystary júrip jatyr. 90-nan astam páterdi zaqymdaǵan órttiń neden shyqqany áli belgisiz. Al jergilikti turǵyndardyń aıtýynsha, jalyn birinshi qabattan tutanǵan. Zardap shekken otbasylarǵa jergilikti bılik 240 myń teńgeden kómek kórsetpek.
93 páterlik úıdiń altynshy qabaty qatty zaqymdanǵan. Myna bir bólmeli páterdiń ishinen ilip alar zat tappaısyz. Tońazytqysh, televızor, telefon syndy ózgede turmystyq tehnıkalar erip ketken. Al úıdiń qojaıyndary bolsa qara kúlge aınalǵan dúnıelerin kórýge batpaı, júregi daýalamaı, dalada júr.
Keshe keshke shyqqan órt kezinde 300-den astam adam evakýasıalanǵan edi. Biraq turǵyndardyń birazy órt shyqqanda úıde emes, jumysta bolǵan edik deıdi. Tipten páteri janyp ketken jandardyń ishinde ıpotekalyq qaryzdan áli qutylmaǵan qaýymda bar.
Kókjıektegi qorshaýǵa alynǵan úıge adamdar tek arnaıy ruqsatpen ǵana kirip, jaramdy zattary men qujattaryn alyp jatyr. Ǵımarat gaz, toq, jaryqtan tolyq ajyratyldy. Dereý qurylǵan arnaıy komısıa shyǵyndy esepteýge kirisken.
«Qala ákiminiń arnaıy tapsyrmasy boıynsha úıdi jyldam qalpyna keltirý jumystary júrgiziledi. Jobalaýshy ınstıtýt mamandary, qurylyspen aınalysqan mekemelerdi shaqyramyz. «Kókjıek» shaǵyn aýdanyndaǵy bul úılerdi salý 2007 jyly bastalyp, 2010 jyly aıaqtalǵan», - dedi Almaty qalasy Jetisý aýdanynyń ákimi Muhtar Tájiabaev.
Páteri órtengen turǵyndardy mektep asqanasynan tegin tamaqtandyrý men sport zalda jatyn oryn qarastyrylǵan. Biraq uıymdastyrýshylar kesheden beri birde bir adam qonýǵa kelmeı, týys, tanystaryna ketti deıdi. Al aýdandaǵy áleýmettik jumyspen qamtý bóliminiń mamandary zardap shekken ár bir otbasyna 240 myń teńge kóleminde aqshalaı kómek kórsetpek.
