Almatyda tastaıaqtan álem chempıonaty ótip jatyr. Jer jahannan kelgen has sheberler «dınamıkalyq pıramıda» boıynsha kim myqtydan kil myqtyny anyqtaýda.
27 jastaǵy Álıhan Qaraneev 3 dúrkin álem chempıony. Bılárdqa kishkentaıynan qyzyǵady. Osy jarysta da top jaram dep otyr. Alaıda, álsiz qarsylastyń joq ekenin aıtady. Biraq dúbirli dodanyń Almatyda ótip jatqany - qosymsha kúsh beredi deıdi.
«Bul jarysty jeńý - men úshin úlken mártebe. Sondyqtan men chempıon bolýym úshin barymdy salamyn. Jankúıerlerdiń úmitin aqtaımyz dep oılaımyn. Qazaqstan osy chempıonatta komandalyq esepte birinshi oryn alyp, kýbokty ózimizde alyp qalýymy kerek. Dúbirli dodaǵa álemniń kil myqtylary kelgen. Álsiz dep qaraýǵa bolmaıdy. Árqaısysyna tyńǵylyqty daıyndyqpen shyǵamyn», - dedi Bılárdtan álem chempıony Álıhan QARANEEV.
Qazaqstan bılárd federasıasy Álıhannan ózge de sportshylarymyzǵa úlken senim artamyz deıdi. Otandastarymyzdyń osal emes ekenin aıtady.
«Bizdiń ulttyq quramanyń daıyndyǵy joǵary deńgeıde. Sondyqtan jeńiske jetemiz degen oıdamyz. Jarysqa elimizdiń atynan eki álem chempıondary qatysyp jatyr. Álıhan Qaraneev pen Ernar Shymbaev ótken jarystarda keremet kórsetkishterge qol jetkizdi. Birneshe dúrkin álem chempıondaryn jarys jolynan shyǵaryp tastaǵan bolatyn. Biz bul jigitterden tek altyn kútemiz», - dedi QR Bılárd federasıasynyń vıse-prezıdenti Maqsat DAÝYLBAEV.
Álem birinshiligine 19 memleketten kelgen 100-ge jýyq sportshylar ózara myqtyny anyqtaıdy. Jarystyń júlde qory 12 mln teńgeni quraıdy. Myqty komandalar qatarynda bizdiń quramadan bólek Reseı, Belarýs, Ýkraına jáne Qyrǵyzstan bar.
«Men bul jarysta favorıt dep 10 myqty sportshyny atar edim. Qazaqstandyq qatysýshylardyń arasynda myqtylar kóp. Onyń ústine óz jerlerinde bolyp jatqannan keıin, ońaıyraq bolady dep oılaımyn. Sportshylar psıhologıalyq turǵyda joǵary daıyndyqpen shyǵýlary kerek», - dedi RF Bılárd sport federasıasynyń vıse-prezıdenti Aleksandr PÝHLENKO.
Dúbirli dodaǵa 64 erler jáne 32 áıelder komandalary qatysady. Álem birinshiligi Almatyda 8 sáýirge deıin jalǵasady. Aıta keteıin, baıraqty báseke Balýan Sholaq atyndaǵy sport saraıynda ótedi.
