Almatyda «Otyrar sazy» orkestriniń konserti ótti.

Qazaqtyń birtýma kompozıtory, daryndy dırıjer Nurǵısa Tilendıevtiń bıyl ómirden ozǵanyna 20 jyl tolady. Dáýlesker kúıshiniń kózi tiri bolsa 93 jasqa tolar edi.

Kúni keshe Tilendıevtiń týǵan kúnine oraı, «Otyrar sazy» orkestriniń konserti ótti. Keshte sazgerdiń halyq súıip tyńdaıtyn jıyrmadan astam mýzykasy oınalyp, kúıleri kúmbirledi. Qazaq mýzyka mádenıetinde óshpes iz qaldyrǵan erekshe daryn ıesine kózi tirisinde-aq «qazaq sazynyń saıypqyrany» degen ataq berilgen edi. Kompozıtordyń artynda qalǵan murasy ólsheýsiz. Ásirese, ol qurǵan «Otyrar sazy» orkestri kúlli qazaqtyń maqtanyshyna aınaldy. Óner ujymy bıyl shet elderge gastrólge kóptep shyǵyp, birtalaı ıgi sharalardy qolǵa almaq.

«Ákemniń qaıtqanyna osy jyly 20 jyl. Oıda kóptegen maqsattar tur. Barlyǵyn ashpaı-aq qoıaıyn. Qaıtqanyna osy qarashanyń 15-de úlken konsert ótkizeıik dep jatyrmyz. Mýzeıdiń ishinde birneshe ózgerister bolý kerek, ony endi qazir ashqanym durys bolmaıtyn shyǵar», - dedi N.Tilendıev atyndaǵy «otyrar sazy» orkestriniń jetekshisi Dinzýhra Tilendıeva.

«Ol uly kompozıtor, ol halyqqa jaqyn kompozıtor. Halyqtyń júreginen shyqqan, júregindegi ánderdi jazǵan kompozıtor. Onyń qazir 20 jyl boldy dep jatyrmyz ıa ketkenine, sonyń ózinde bir shyǵarmasy oınalmaı qalǵan joq. Orkestri oınap jatyr, konsert berip jatyr. Ol konsertke kórermenderi kelip, rahattanyp tyńdap ketedi. Ol kisi bulaı oılasań ólgen joq. Óıtkeni, keremet orkestr qaldyrdy», - dedi N.Tilendıevtiń jubaıy Darıǵa Tilendıeva.