Almatyda alys-jaqyn shet eldiń kil myqty bıshileri anyqtaldy. Qazir ǵana halyqaralyq «Órleý» horeografıalyq baıqaýy máresine jetip, jeńis tuǵyryna shyqqan eń úzdikteri marapattaldy. Álemniń ár túkpirinen kelgen myń buralǵan jas bıshilerdiń bıylǵy saıysy qalaı ótti? Kósh bastaǵan kimder ekenin bizge sol baıqaýda júrgen áriptesim Aıdana Meırambaıqyzy aıtyp berýge daıyn tur.
Qazaqstan Respýblıkasy Tuńǵysh Prezıdent qory men Seleznev atyndaǵy horeografıa ýchılıshesiniń uıymdastyrýymen 2010 jyldan beri ótkizilip kele jatqan bıshiler baıqaýy bıyl osymen altynshy ret uıymdastyryldy. 2 jylda bir ret ótkizilse de, jyldan-jylǵa aýqymyn keńge jaıǵan balet báıgesine bıyl Qazaqstannan bólek, Birikken Arab Ámirlikteri, Japonıa, Túrkıa, Reseı, Ózbekstan jáne Qyrǵyz respýblıkasynan bas-aıaǵy 147 bıshi qatysty. Ónerpazdar 3 nomınasıa boıynsha baq synady. Qatysýshylar «klasıkalyq», «zamanaýı» jáne «halyq bıleri» boıynsha saıysqa tústi. Bıshilerge kópti darynymen tamsandyrǵan balet maıtalmandary men horeografıalyq bilim berýdiń kórneki qaıratkerleri qazylyq etti. Olar marapattaý rásimi bastalmas buryn baspasóz konferensıasyn ótkizip, bıylǵy baıqaýdyń erekshelikterin atap ókten edi.
«147 balanyń ishinen eń myqtysyn tańdaý bizge qıynǵa tústi. Óıtkeni, qatysýshylar birinen-biri asqan daryndy. Barlyǵyn bólip-jarmaı jeńimpaz etkimiz keldi. Biraq baıqaýdyń aty baıqaý. Biz bıdi oryndaý texnıkasynan bólek, obrazdyń ashylýyna, ártistik qabiletine, saxnada ózin ustaýyna mán berdik», - dedi qazylar alqasy Iýrıı Vasúchenko (Reseı).
Baıqaýǵa qatysýshylardyń eń kishisi 7-de bolsa, úlkeni 16-da. Jalpy bıshiler jas erekshelikterine qaraı kishi, orta jáne úlken jastaǵy top bolyp saıysty. Nátıjesinde, 147 bıshiniń ishinen, 63-i laýreat atandy. Olarǵa maqtaý qaǵazdary berildi. Al birinshi oryn alǵandarǵa 65 myń, ekinshi oryn ıesine 50 myń jáne úshinshi orynǵa 30 myń teńge tabystaldy.
«Men 2014 jyly osy «Órleý» baıqaýyna qatysyp, ekinshi oryn ıegeri bolǵanmyn. Osy jyly da ekinshi oryn ıegeri atandym. Bul baıqaý saxnada óz-ózińe berik bolýǵa, qorqynyshpen kúresýge kómektesedi. Aldaǵy ýaqytta eshqandaı qorqynysh bolmaı, saxnada óz-ózińdi ustaýǵa beıimdeımiz», - dedi baıqaýdyń ekinshi oryn ıegeri Damılá Shyraly.
Jalpy bul baıqaýdyń maqsaty - bıshilerdiń oryndaýshylyq sheberligin jáne rýhanı áleýetin arttyrý. Erekshe daryndardy anyqtap qana qoımaı, mádenı-shyǵarmashylyq baılanystaryn nyǵaıtý. Aıta ketsek, búgingi baıqaý jas balet ártisteriniń eń úzdik nómirlerinen quralǵan gala-konsertpen aıaqtalady.
