Almatylyq Serik Esmatov «Rýhanı Jańǵyrý» aıasynda qolǵa alynǵan «100 jańa esim» jobasynyń qaharmany atandy. Ár adamnyń taǵdyry - ashylmaǵan bir tarıh. Jas sportshy úshin arbaǵa tańylý ómirdiń qatań úkimi emes. Ol qos aıaǵyn joǵaltqanmen, ózine degen senimdi eshqashan joǵaltqan joq. Ómirdi sheksiz súıetin Serik Esmatov taýsylyp qaıǵyrýdan góri alǵa umtylyp, tirlik etkendi jón kóredi. Qazir jigit súıikti isimen aınalysyp, múmkindiktiń sheksiz ekenin dáleldep júr.

Basyna túsken qıyndyqqa qamyqsada, qarsy turǵan jannyń biri -  voleıboldan Qazaqstan jastar quramasynyń kapıtany -  Serik Esmatov. 20 jastaǵy almatylyq sportshy bala kúninen júzý, kúres pen fýtboldy janyna jaqyn tartypty. Biraq 2011 jyldyń 30 tamyzynda oryn alǵan oqıǵa onyń ómirin kúrt ózgertti. Jattyǵýdan sharshap kele jatqan bala abaısyzda poıyz astyna túsip, qos aıaǵynan aıyrylǵan. Saǵy synbaǵan jigit araǵa biraz ýaqyt salyp sportqa qaıta oralyp, otyryp oınaıtyn voleıbolmen aınalysyp júr. Almatyda ótip jatqan Qazaqstan chempıonatynda onyń komandasy búgingde baq synap jatyr.

«Chempıonatqa elimizdiń ár túkpirinen myqty 10 komanda qatysýda. Bizge ázirge júldeli oryndarǵa talasýǵa erte dep sanaımyn. Bir jaǵynan, jańadan qurylǵan komanda bolǵandyqtan biraz jattyǵyp, tájirıbe jınaýymyz kerek. Elimizde deńgeıi joǵary sportshylardyń bary qýantady. Olarǵa qarap, biz boı túzeımiz, alǵa umtylamyz. Men damymaı, bir orynda turǵandy unatpaımyn. Ár kúnnen ózińe paıdaly dúnıeni alyp qalý kerek», - dedi Qazaq týrızm jáne sport akademıasynyń stýdenti, voleıboldan Qazaqstan jastar quramasynyń kapıtany Serik Esmatov.

Komanda kapıtany kóp jaǵdaıda jeńilisten keıin sportshylardyń saǵy synyp, eńseleri túsip ketetinin aıtady. Biraq Serik taǵdyr basyna aýyr synaq bergende de esh moıymaǵanynyn úlgi qylady. «Ózińdi ózgelerden shektetpeı, qaıta tyǵyraqtan shyǵýdyń jolyn izdeý eń abzal is» deıdi «100 jańa esim» jobasynyń tizimine kirgen azamat. Júrektegi qorqynyshty jeńip, ómirin súıikti isimen mándi etken onyń bolashaqta iske asyrar jospary kóp.

«Ár kún saıyn tańerteń aman-esen oıanýdyń ózi baqyt. Bul men úshin ómirimniń jańa beti. Sol qaıǵyly jáıtten keıin aman qalǵanym úshin qýanamyn. Qıyn, árıne. Alda oqýymdy aıaqtap, sportta ózim qalaǵan jetistikke jetýdi armandaımyn. Odan keıin, elge qolǵabys bolatyn biraz áleýmettik jobalardy qolǵa alsam dep otyrmyn», - dedi Qazaq týrızm jáne sport akademıasynyń stýdenti, voleıboldan Qazaqstan jastar quramasynyń kapıtany Serik Esmatov.

Serik 2013 jyly Malazıada voleıboldan ótken  paralımpıadalyq týrnırde qola medal jeńip alǵan. Bapkerleri Seriktiń jarqyn jeńisteri áli alda dep senedi. Óıtkeni, 2 kýrs stýdenti sabaqpen qatar birneshe sport túrimen qatar  aınalysyp júr.