Almatyda destrýktıvti dinı aǵymda bolǵan 244 adam raıynan qaıtarylǵan.

Ótken jyly Almatyda destrýktıvti dinı aǵymda bolǵan 244 adam raıynan qaıtarylǵan. Qalalyq Din isteri jónindegi basqarma basshysy Aıdar Esenbekovtyń aıtýynsha, Almatydaǵy dinı ahýal qazir turaqty. Dástúrli emes dinı aǵymdardyń taralýy edáýir azaıyp, halyq onyń adasý joly ekenin túsine bastaǵan. Sonymen qatar, basqarma basshysy mundaı teris aǵymdardyń jetegine ketkender qylmystyq túzeý oryndarynda da kezdesetinin málimdedi. Almaty aýmaǵynda ornalasqan túrmelerde 28 adam osyndaı baǵytty ustanyp kelgen. Qazir olarmen mamandar jumys jasap jatyr.

«Belgili bir toptardyń áreketteri, bilesizder tyıym salynǵan. Jetekshileri boıynsha biz ákimshilik hattamalar toltyryp, qazir jaýapqa tartyp jatyrmyz. Ótken jyly bizde 36 osyndaı ákimshilik hattama toltyrylyp, din salasyndaǵy zańnamany buzǵan boıynsha, sottyń sheshimimen aıyppuldar salyndy. Zań turǵysynan biz din salasyndaǵy zańdy buzǵan azamattar úshin jaýapkershilikti kúsheıtip jatyrmyz. Ol bolmasa da bul saladaǵy máseleni úılestirý, árıne, qıyn bolary anyq», - dedi Almaty qalasy Din isteri jónindegi basqarma basshysy Aıdar Esenbekov.

Toltyrylǵan ákimshilik hattamalardyń arqasynda jalpy somasy 4 mıllıon teńgege jýyq aıyppul salynypty. Onyń ishinde dinı mazmundaǵy ádebıetterdi taratý boıynsha -14; dinı rásimderdi belgilengen oryndardan tys ótkizý boıynsha – 6; ruqsatsyz mısıonerlik qyzmetti júrgizgen -12; dinı rásimderge kámelet jasqa tolmaǵandardyń qatysýy boıynsha - 4 derek tirkelgen.