Almatyda «Jas ǵalym» halyqaralyq konferensıasy ótti.

Almatyda jas ǵalymdardyń talantyn ashyp, shyǵarmashylyǵyn shyńdaıtyn halyqaralyq jıyn ótti. Álemniń alty memleketinen kelgen profesorlar tájirıbelerimen bólisip, qazaqstandyq stýdentterdiń qabiletterin baqylap kórdi. Osymen besinshi ret uıymdastyrylyp otyrǵan konferensıa «Rýhanı jańǵyrý» baǵdarlamasy aıasynda ótip otyr.

«Jas ǵalym» halyqaralyq  konferensıasyna elimizdiń izdenimpaz jastary men olardyń ǵylymı jetekshileri qatysty. Sonymen qatar, Qyrǵyz, Ózbekstan, Shotlandıa, Ulybrıtanıa, AQSH jáne Polshadan kelgen profesorlar arnaıy shaqyrylǵan. Olar qazaqstandyq  jas ǵalymdarǵa 1 apta boıy trenıń ótkizgen. Uıymdastyrýshylardyń sózinshe, básekege qabiletti 30 eldiń qataryna jyldam qosylý úshin sheteldik mamandardyń tájirıbelerin qoldaný  óte mańyzdy. Bul bir jaǵynan adamı kapıtaldy damytýǵa zor múmkindik beredi.

«Mysaly, sizde tanymal, jaqsy ǵalym bolý úshin ol kiside bir strategıalyq jospar bolý kerek. Sondyqtan osyndaı búgin taqyryptardy bizdiń jas ǵalymdarǵa úıretip jatyr shetelden kelgen áriptesterimiz. Olardyń bul oraıda tájirıbeleri óte úlken. Sondyqtan biz osyndaı kongresimizdiń jas ǵalymdarymyzdyń damýyna óte úlken úles qosady degen senimimiz mol», - dedi Almaty qalasy Eýrazıa tehnologıa ýnıversıtetiniń rektory Janar Temirbekova.

Jıynda sheteldik profesorlar óz baıandamalaryn oqyp, ǵylymı jobany qalaı jasaý kerektigin stýdentterge aıtty. Odan bólek, ónertapqyshtarǵa tek tabysty oılamaý kerektigin túsindirdi. Kerisinshe, qoǵamǵa paıdasy bar jobalardy iske asyrýǵa talpyný qajet deıdi. 

«Qazaqstandyq stýdentterdiń aıaq alysy jaman emes. Munda jas ǵalymdar bir-birimen jarysa oqıdy. Túrli jańashyldyq ashyp, qoǵamǵa paıdasy bar jobalardy ashqylary keledi. Sondyqtan bizde úırenemin dep turǵan adamǵa tájirıbemizben bóliskendi jón kórdik», - dedi profesor Rafız Abazov (AQSH).

Elbasynyń «Rýhanı jańǵyrý» maqalasynda jazylǵandaı, jahandyq naryqta sapasy jóninen ózgelerden utymdy dúnıe usynýdy úırený kerek, deıdi ǵalymdar. Konferensıaǵa kelgen qonaqtar qandaı salada ǵylymı zertteý jasaý kerektigimen bólisti.

«Osy kúni álem ǵalymdary jańartylatyn qýat kózderin paıdalaný jolynda eńbek etip jatyr. Qazaqstan munaı men kómirge baı memleket. Biraq odan da bas tartatyn kez keledi. Qazaqstandyq jas ǵalymdar jańartylatyn qýat kózin qoldanatyn jańa jobalar jasaý kerek», - dedi Aberteı ýnıversıtetiniń aǵa oqytýshysy Nıkolaı Mýravev (Shotlandıa).

«Jas ǵalym» halyqaralyq konferensıaǵa elimizdiń 20 ýnıversıtetinen stýdentter qatysty. Jıynda ózderiniń baıandamalaryn oqydy. Eń qyzyqty degen eńbekke maqtaý qaǵazdary tabystaldy. Eske salaıyq, ǵalymdardyń bas qosýy osymen 5-shi ret uıymdastyrylyp otyr. Bıylǵy shara «Rýhanı jańǵyrý» baǵdarlamasy uıymdastyrylǵan.