Aqtóbelik Ermek esimdi jigit Sheshenstan prezıdenti Ramzan Qadyrovqa vıdeoúndeý joldady.
«2016 jyly bizdiń qalada terakt bolǵanda alǵashqy bolyp kómek qolyn sozǵan siz boldyńyz. Biz muny umytpaımyz», - dep sózin bastaǵan jigit Sheshenstan prezıdentinen Kenesary Qasymovtyń bassúıegin Qazaqstanǵa qaıtarýǵa kómek surady. Vıdeo YouTube jelisindegi Kavkaz News Chechnya arnasyna jarıalandy.
«Reseıdegi Sankt-Peterbýrg murajaıynda bizdiń uly babamyz Kenesary Qasymovtyń bassúıegi bar. 1837 jyly ol ult azattyq qozǵalysyn basqardy. Sizdiń ákeńiz sekildi ol da ultynyń qamy men erkindigi úshin kúresti. Biraq 1847 jyly ony satyp ketti. Onyń basyn shaýyp, orys kóseminiń qolyna tapsyrdy», - dedi jigit.
Sonymen qatar jigit prezıdentten Pýtınmen kezdeserde osy ótinishti jetkizýin surady.
«2016 jyly Dmıtrıı Medvedev Kenesarynyń bassúıegin qaıtarý úshin tyrysatynyn aıtqan, biraq sózinde turmady. Men bilemin, siz sózdiń adamysyz. Sol sebepti Pýtınmen kezdesip jatsańyz, Kenesarynyń súıegin Qazaqstanǵa qaıtarýǵa ótinish aıtsańyz. Onyń ústine ózge adamnyń bassúıegin murajaıda saqtaý durys emes», - deıdi aqtóbelik azamat.
