Brússeldiń birinshi ınstansıadaǵy soty QR Ulttyq qor aktıvteriniń shamamen 21,5 mıllıard dollar somasyna aldyn ala tyıym salýdy joıyp, 530 mıllıon dollar kólemindegi qalǵan qarajatty shekteýdi aǵylshyn sottarynda alyp tastaýǵa bolady degen sheshimge keldi, dep habarlaıdy Qamshy.kz aqparat agenttigi QR Ádilet mınıstrliginiń baspasóz qyzmetine silteme jasap.
2010 jyly Qazaqstanǵa qarsy talap-aryzdardy bastaǵan eki moldovan kásipker Anatol jáne Gabrıel Statı Shvesıadaǵy tórelik arqyly Qazaqstannan 4 mıllıard dollar talap etti, alaıda olarǵa 500 mıllıon dollar uıǵaryldy. Osy qarajattyń ishinen 199 mıllıon dollar gaz óńdeý zaýyty qurylysyna ketken shyǵyndarmen baılanysty bolǵan tárizdi.
Keıinnen, AQSH-ta bólek sot prosedýrasy arqyly alynǵan qujattar arqyly Qazaqstan Statıdiń talaptary iri alaıaqtyqqa negizdelgendigi jóninde dálelder aldy. Shvesıa tórelik sheshimniń kúshin joımaı jáne alaıaqtyq faktisin esepke almaǵanyna qaramastan, Anglıanyń Joǵary soty usynylǵan dálelderdi qarastyrdy. Byltyr maýsym aıynda tórelik sheshim alaıaqtyq jolymen alynǵandyǵy týraly dálelder bar degen qorytyndyǵa kelip, sáıkesinshe aǵymdaǵy jyly qazan aıyna alaıaqtyqtyń máni boıynsha tyńdaý ótkizýdi belgiledi. Osydan keıin Qazaqstannyń Ulttyq bankine jáne Ulttyq qorǵa tıesili 22 mıllıard dollarynan astam soma kólemindegi aktıvterge aldyn ala tyıym salynyp, bul soma olardyń talaptarynan anaǵurlym asyp túsedi.
Belgıalyq sot ýaqytsha tyıym salý Statıdiń talaptary men shyǵyndarynyń somasymen ǵana, atap aıtqanda 530 mıllıon dollarmen shektelýi kerek dep uıǵara otyryp. Bul Qazaqstannyń Ulttyq bankine tıesili shamamen 21,5 mıllıard dollar mólsherindegi aktıvterinen shekteýdi alyp tastaýǵa ákeledi. Budan basqa belgıalyq sottyń uıǵarýynsha, tyıym salý úshin negizdiń bar-joqtyǵyn naq aǵylshyn sottary sheshýi tıis. Qazaqstan Respýblıkasy men Qazaqstannyń Ulttyq banki tyıym salynǵan qarajattyń qalǵan bóliginen shekteýdi alyp tastaý úshin Anglıada tıisti áreketter qabyldaıtyn bolady.
«Tyıym salynatyn qarajatty ulǵaıtý jáne bul rette úshinshi tulǵalardy qamtýǵa baǵyttalǵan Statıdiń strategıasyna syzat tústi. Statıdiń strategıasy bastapqyda elimizge qysym kórsetýge baǵyttalǵan», - deıdi Qazaqstan Respýblıkasy Ádilet mınıstri Marat Beketaev.
Belgıalyq sheshim Statı alaıaqtyq týraly dáleldemeler qarastyrylatyn sot talqylaýyn aıaqtaı almaı, Anglıada iri jeńiliske ushyraǵannan keıin bir apta ótken soń shyqty.
Statı Anglıadaǵy sot talqylaýlaryn qazaqstandyq aktıvterge tyıym salýǵa qol jetkizý úshin bastady. Alaıda sot alaıaqtyq dáleldemelerine qyzyǵýshylyq tanyta bastaǵanda-aq olar isti toqtatýǵa talpyndy. Ótken aptada sot talqylaýyn keıinge qaldyrýǵa tyrysty. Sebebi budan bylaı olar óz quqyqtaryn ózderi qorǵamaq. Óıtkeni olardyń advokattary King and Spalding birneshe kún buryn olardyń quqyqtaryn qorǵaýdy toqtatty.
Londondyq sot onyń ornyna sot talqylaýy qazan aıynda jalǵasýy kerek dep sheshti jáne Qazaqstanǵa sot shyǵyndaryn tóleýdi uıǵardy.
