Almatyda menıngokok ınfeksıasynan 19 jastaǵy qyz bala qaıtys boldy, dep habarlaıdy Qamshy.kz aqparat agenttigi, qoǵamdyq densaýlyq saqtaý departamentine silteme jasap.

"Qyz bala 19 jasta. Ol Qaskeleńdegi ınfeksıalyq aýrýhanada qaıtys boldy. Aýrýhanaǵa tańǵy 7.25-te tústi. Eki saǵattan soń kóz jumdy",-dep habarlady departament basshysy Erǵalı Sydymanov. Ol qyz balanyń oqysta kóz jumýyna dáriger kómegine kesh júgingeni sebep bolǵanyn atap ótti.

"Qyz bala 1 maýsym kúni syrqattanyp qalǵan. Jedel járdem shaqyrǵan",-dedi Sydymanov. 

Densaýlyq saqtaý departamenti basshysynyń aıtýynsha qyz bala jaqynda qaıtys bolǵan 5 jastaǵy balanyń tanysy bolyp shyqqan. 

"Boıjetken osy dıagnozdan kóz jumǵan balanyń tanysy eken. Bala Talǵar aýdanynda tirkelgen. Biraq Almatydaǵy balabaqshaǵa barǵan. Olardyń Almatyda páteri bar. Bizdiń boljaýymyz boıynsha, bala búgin kóz jumǵan qyzben dúısenbiden jumaǵa deıin bir úıde bolǵan. Al senbi, jeksenbi kúnderi Talǵarǵa qatynap júrgen", - dep naqtylady Erǵalı Sydymanov.

Sydymanovtyń málimdeýi boıynsha qazir oblysta menıngokok ınfeksıasynan qaıtys bolǵandar sany úsh adamǵa jetken. 

Esterińizge salsaq, búgin QR Bas sanıtarıalyq dárigeri menıngokok ınfeksıasyna baılanysty jelide taraǵan aýdıojazba týraly vıdeoúndeý joldaǵan bolatyn.