«Valútalyq retteý jáne valútalyq baqylaý týraly» zań jobasyn qabyldaýdyń negizgi mindeti valútalyq operasıalar monıtorıńin keńeıtý jáne Qazaqstan aýmaǵyndaǵy esep aıyrysýlarda shetel valútasyn qysqartý bolyp tabylady. Zań jobasyn qabyldaý qarapaıym azamattarǵa áser etpeıdi, sebebi valútalyq retteýdiń yryqtandyrylǵan qaǵıdattary saqtalǵan. Bul týraly búgin Qazaqstan Ulttyq Bankiniń Tóraǵasy Danıar Aqyshev QR Parlamenti Senatynyń plenarlyq otyrysynda baıandama jasaǵan kezde aıtyp berdi, dep habarlaıdy Qamshy.kz aqparat agenttigi QR Ulttyq bank baspasóz qyzmetine silteme jasap.

Ol zań jobasy sheńberinde negizgi túzetýlerdi atap ótti.

«Birinshi – bul sheteldik uıymdardyń fılıaldaryn rezıdentter retinde taný. Qoldanystaǵy zańnamaǵa sáıkes sheteldik uıymdardyń fılıaldary beırezıdentter retinde Qazaqstanda valútalyq operasıalardy júzege asyrýǵa quqyly. Olardyń Qazaqstan tulǵalarymen esep aıyrysýyn teńgege aýystyrý usynylady», - dedi D. Aqyshev. Ol osy túzetýlerdiń jergilikti kompanıalar men sheteldik uıymdardyń fılıaldary úshin bıznes júrgizýdiń teń talaptaryn qamtamasyz etýge múmkindik beretinin atap ótti.

«Kelesi – bul valútalyq operasıalar týraly aqparat jınaý rásimderin jeńildete otyryp beırezıdenttermen valútalyq operasıalardy qamtýdy keńeıtý», - dedi Qazaqstan Ulttyq Bankiniń basshysy. Ol tirkeý men habarlaýdyń kúrdeli rejımi joıylatynyn atap ótti. Olardyń ornyna valútalyq sharttardy biryńǵaı eseptik tirkeý engiziledi.

Zań jobasynda aqshany elden áketý belgileri bar valútalyq operasıalardyń tizbesin engizý arqyly elden aqshanyń áketilýine qarsy is-qımyldy kúsheıtý kózdeledi. Ol mundaı belgilerge aqshanyń Qazaqstandaǵy shotqa túsýin kózdemeıtin qarjylaı qaryzdar, sondaı-aq paıyzsyz qaryzdar, 720 kúnnen astam merzimge beriletin komersıalyq kredıtter jatatynyn túsindirdi.

D. Aqyshevtyń aıtýynsha, elden aqshanyń áketilýine qarsy is-qımyldy kúsheıtýge memlekettik kiris organymen belsendi aqparattyq jáne ózge de ózara is-qımyl yqpal etedi. «Aqparatpen tıimdi almasý túrli memlekettik organdarǵa bir mámile boıynsha jalǵan málimetterdi anyqtaýǵa múmkindik beredi», - dep habarlady ol.

«Qazaqstan Respýblıkasynyń keıbir zańnamalyq aktilerine valútalyq retteý jáne valútalyq baqylaý, qarjy uıymdarynyń qyzmetin táýekelge baǵdarlanǵan qadaǵalaý, qarjylyq qyzmetterdi tutynýshylardyń quqyqtaryn qorǵaý jáne Qazaqstan Respýblıkasy Ulttyq Bankiniń qyzmetin jetildirý máseleleri boıynsha ózgerister men tolyqtyrýlar engizý týraly» ilespe zań jobasynyń sheńberinde Ulttyq Bank pen Qarjy mınıstrliginiń Memlekettik kirister komıteti arasyndaǵy málimetter almasý boıynsha qarym-qatynastar retteledi.

Sonymen qatar D. Aqyshev Qazaqstandaǵy valútalyq qundylyqtardyń aınalys tártibin naqtylaýdy bólek atap ótti. Ol zań jobasynda banktik emes aıyrbastaý pýnktterine Ulttyq Banktiń shaǵyn quımalaryn satyp alý jáne satý quqyǵy usynylatynyn aıtyp berdi.

Qazaqstan Ulttyq Bankiniń basshysy túzetýlerdiń josparly ekendigin jáne aǵymdaǵy ózgeristerge, onyń ishinde «Qorǵas» shekara mańy yntymaqtastyǵy halyqaralyq ortalyǵy» arnaıy ekonomıkalyq aımaǵynyń qurylýyna, sondaı-aq Qazaqstannyń Dúnıejúzilik saýda uıymyna kirýine baılanysty ekendigin atap ótti.