«Qazaqstan ıpotekalyq kompanıasy» «Nurly jer» turǵyn úı baǵdarlamasy aıasynda ıpotekalyq qaryzdardy sýbsıdıalaýdy toqtatady. Bul týraly kompanıanyń baspasóz qyzmeti habarlady.

Úkimet basshysynyń sheshimi men QR Ulttyq Bankiniń «7-20-25» turǵyn úı baǵdarlamasyn iske qosýyna sáıkes, «Qazaqstan ıpotekalyq kompanıasy» IU» AQ, onyń enshiles uıymy «Báıterek» UBH» AQ «Ipotekalyq nesıelendirýdiń múmkindigin arttyrý» baǵytyn – «Nurly jer» turǵyn úı qurylysy baǵdarlamasy aıasynda júrgizilgen ıpotekalyq turǵyn úı qaryzdary boıynsha syıaqy mólsherlemesin sýbsıdıalaýdy toqtatady.

«Qazaqstan Ipotekalyq Kompanıasy» IU» AQ ekinshi deńgeıdegi bankter bergen ıpotekalyq qaryzdar boıynsha syıaqy mólsherlemesiniń bir bóligin sýbsıdıalady. Baǵdarlama áreket etken ýaqyt ishinde 37,21 mlrd. teńge somasyna 3 566 qaryz maquldandy. Sonyń ishinde, 2017 jyldyń jeti aıynda - 13,3 mlrd. teńge somasyna 1303 qaryz, 2018 jyldyń bes aıynda 23,9 mlrd. teńge somasyna 2 263 ótinim qabyldandy.

Aǵymdaǵy jyldyń qańtarynda maquldanǵan qaryzdar somasy shamamen 4 mlrd. teńge, aqpan aıynda - 3,66 mlrd. teńge, naýryzda - 3,7 mlrd. teńge, sáýirde - 4,4 mlrd. teńge, mamyrda - 3,8 mlrd. teńgeni qurady. 2018 jyldyń maýsym aıynda 20 kún ishinde kompanıaǵa 4,3 mlrd. teńge somasynda 385 ótinish tústi.

Sýbsıdıalaý boıynsha jumystardy «QIK» IU» AQ ekinshi deńgeıli banktermen: «Bank SentrKredıt» AQ, «Sberbank» AQ EB, «Bank VTB» AQ, «ATFBank» AQ, «Nurbank» AQ, «Sesnabank» AQ jáne «Qazaqstannyń turǵyn úı qurylys jınaq banki» AQ («Jeke turǵyn úı qurylysyn damytý» baǵyty boıynsha) birlesip júzege asyrdy.

Sýbsıdıany toqtatý týraly qaýly jańa qaryzdarǵa ǵana qoldanylady. «Qazaqstan Ipotekalyq Kompanıasy» IU» AQ aǵymdaǵy sharttar boıynsha sýbsıdıalaýdy sharttarda kórsetilgen talaptarda jalǵastyrady.