Aqtóbe qalasynyń turǵyny perzenthanaǵa asyqqan áıelin úıiniń kire berisindegi baspaldaqta bosandyryp alǵan. Kindik sábıdiń moınyna oralyp qalǵan eken, alaıda kúıeýi esh saspastan balanyń ómirin aman alyp qalǵan. Bul týraly «Dıapazon» jazdy.

Aıan Ulannyń aıtýynsha, áıeliniń tolǵaǵy túnde qysqan. Taksı shaqyrtyp, kerek zattardyń bárin alyp perzenthanaǵa barmaq bolady, alaıda sábıi kútkisi kelmegen sekildi. Áıel úıden shyǵyp bara jatqan kezde bosandy.

«Bári baspaldaqtan túsip kele jatqan kezde bastaldy. Sulýymdy kórpege jatqyzdym, ol qatty sasqalaqtady. Sabyr saqtaýyn ótinip, «Demal! Kúshen!» dep qaıtalaı berdim. Úshinshi ret kúshengeninde bosandy. Biraq bala jylamady. Sóıtsem, kindik sábıimniń moınyna oratylyp qalǵan eken. Ony sheship edim, birden jylady. Sasqanymnan 101-ge, órt sóndirý qyzmetine habarlasyp jiberippin. Keıin jedel-járdemge habarlastym. Olar eki mınýttan keıin-aq keldi. Shyny kerek, óte qorqynyshty boldy, biraq syr bermeýge tyrystym», - deıdi Aıan Ulan.

Jedel-járdem kelip, ana men balany aýrýhanaǵa alyp ketedi. Al qazir ekeýi de úıinde. Qyrqynan shyǵarmaǵandyqtan, sábıdiń esimin ata-anasy jasyryn ustady.