On jyldyq daǵdarystan keıin Qazaqstan bank naryǵy ózgere bastady, dep jazady Forbes Kazakhstan jýrnaly. Oǵan eldegi joǵary bıliktiń saıası yqpaly, Ulttyq banktiń qatań retteýi jáne halyqaralyq qarjylyq esep standarttarynyń jańa erejeleri, naryqtaǵy básekelestiktiń nasharlaýy, bilikti mamandardyń bolmaýy jáne taǵy basqalar áser etken.

«Qazaqstandyq bankter memlekettik aqshasyz ómir súrýge qalaı daıyndalýda?» dep bastalatyn maqalada eldegi shaǵyn jáne orta bıznesti kredıtteý talaby joǵary ekeni, kepil suralyp, paıyzy tym kóp bolatynyna nazar aýdarylǵan. Bankterdiń túrli naryqta qosymsha tabys taba alatynyn jazǵan maqala saraptamalardyń jetkiliksizdigi men aksıoner tarapynan jańa tehnologıalardy engizýge degen enjarlyqty da synaıdy.

QR Ulttyq banki men Qazaqstan qor bırjasy kase.kz-ke,  jáne bankterdiń resmı saıttaryndaǵy aqparattarǵa negizdelip «Baker Tilly Kazakhstan Advisory» JSHS Qazaqstan bankteriniń reıtıńin jasaǵan.

Tizimniń basynda burynǵysha «Qazaqstan halyq banki» AQ tur.

73,6 paıyz aksıasy «ALMEKS» kompanıasy arqyly Tımýr jáne Dınara Qulybaevtarǵa qaraıtyn eldegi eń iri bank Ózbekstanmen saıası qatynas jaqsarǵan soń mamyrda Ózbekstannan da fılıal ashatynyn málimdegen. Bir jyl buryn 5 shildede Qazkommersbankti Keńes Raqyshevten satyp alǵan Halyq bank keshe ǵana eki banktiń júıesin tolyqtaı biriktirdi.

Tizimde ekinshi oryndy «Kaspi Bank» AQ alǵan. 10 paıyzǵa jýyq aksıasy ıesi Mıhaıl Lomtadze menedjerligindegi banktiń 28,22% aksıasy Prezıdenttiń nemere inisi Qaırat Satybaldyǵa tıesili. Bank kaspi.kz ınternet magazınymen erekshelenedi.

Úshinshi oryn «Qazaqstannyń Turǵyn úı qurylys jınaq bankine» tıesili. Lázzat Ibragımova basqarýyndaǵy bank tolyqtaı memleketke tıesili. Turǵyn úı ıpotekasyn berý úshin 15 jyl buryn qurylǵan. 2017 jyly jeke tulǵalardyń salymy 524,6 mlrd teńgege jetken.

Tizimdi ary qaraı «Sesnabank», «Sberbank»,  «Bank SentrKredıt», «ForteBank», «Bank Hoým Kredıt» jalǵaıdy. Ondyqty byltyr ǵana Qytaıdyń China CITIC Bank-i 60 paıyz aksıasyn satyp alǵan «Altyn Bank» pen «ATFBank» tamamdaıdy.

Tizimge Qazaqstannyń 32 banki kirgen.