Ótken jyly elektrondy saýda kólemi 30%-ǵa ósip 1 mıllıard dollardy qurady. Bul týraly Almatyda «Elektrondyq komersıany damytý úrdisi: mıf nemese shyndyq» bıznes-forýmyna qatysýshylar málimdedi.
Qazaqstandaǵy elektrondy saýda naryǵy otandyq ınternet-dúkenderinde jáne elektrondyq qyzmetter saıttarynda satyp alý sany boıynsha TMD elderi úshtiginiń qataryna endi.
Bıylǵy jyly mamandardyń aıtýynsha onlaın satylym men onlaın qyzmet kórsetý kem degende eki ese ulǵaıady. Elektrondy saýda salasynda aldyńǵy rólge shaǵyn jáne orta bıznes ókilderi shyǵady.
Nazar aýdaratyn taǵy bir úrdis - Ortalyq Azıa elderiniń naryǵynda ınternet-dúkender jelisi damyp, aqshasyz tólem platformalary qurylýdyń nátıjesinde qazaqstandyq kásipkerler bul baǵytta jumys jasaýda.
Qazaqstandyq ınternet bıznes Asosıasıasynyń prezıdenti Konstantın Gorojankınniń aıtýynsha, Qazaqstan, Ózbekstan, Tájikstan, Qyrǵyzstannyń ınternet-dúkenderi Ortalyq Azıanyń naryǵyna shyǵyp aıaqqa nyq turǵannan keıin, jahandyq iri oıynshylar qatarynan kórinýdiń múmkindigi joǵary. Bul óz kezeginde elderdegi elektrondy saýdany damyta qoımaı, kompanıalardyń dárejesin arttyrady. Naryqta joq jańa qyzmetterdiń paıda bolýyna múmkindik berip, onyń baǵytyn anyqtaıtyn bolady.
Budan ózge, Konstantın Gorojankın startap-qozǵalystardy Almaty, Astana, Aqtaý qalalarynda ǵana qoldaý arqyly jaqsy nátıjege jetý múmkin emes ekenin aıtty.
«Qazaqstanda qazir 3 mıllıoner qala bar. Internet saýdany endi qolǵa alǵandarǵa kásipterińdi mıllıoner-qalalarda bastańdar dep keńes beremin. Bul bızneste tek Qazaqstannyń naryǵymen shektelip qalýǵa bolmaıdy. 16-34 jastaǵy tutynýshylar sany 1 mln adam bolatyn Tashkenttiń múmkindigin de eskergen durys. Eger osy qalalar nysanaǵa alynsa, Ortalyq Azıa elderiniń ınternet naryǵy bizdiń qolymyzda bolady. Bul naryqta kóshtiń sońynda emes, aldynda júrgender ǵana utady», – dedi Konstantın Gorojankın.
Sondaı-aq, úkimet 2021 jylǵa qaraı Qazaqstandaǵy saýda-sattyqtyń
2-3%-y e-kommersıa naryǵynyń úlesinde bolady dep úmittenip otyr. Qazirgi kórsetkish 1,9% ǵana. Ulybrıtanıada bul kórsetkish - 17, Germanıada – 21, Reseıde - 6%-ǵa jetken. Internet-saýdanyń damýyna úles qosatyn top 16-34 jas aralyǵyndaǵy jastar. Qazaqstanda osy jastaǵy tutynýshylardyń úlesi 12%-ǵa da jetpeıdi. Al kórshiles Ózbekstanda jastardyń úlesi 27%-dan asyp ketken eken.
