Túrkistan oblysyndaǵy Abaı aýylynda zorlanǵan 7 jastaǵy balanyń isine qatysty jańa derek. Buǵan deıin óziniń qorǵaýyndaǵy jasóspirimniń zorlanǵanyn dáleldeı almaı júrgen senimdi ókil endi Bas prokýratýranyń resmı málimdemesinen keıin mektep dırektorlary men tárbıe jónindegi orynbasarlaryn jáne psıhologtardy sotqa bermekshi. Qurmanǵazy Músir sondaı-aq, qupıa júrgizilgen tergeý isiniń keıbir qujattaryn pedagogtarǵa jarıa etken tergeýshini de jazaǵa tartýdy kózdep otyr. Al, aýdandyq bilim bólimi bolsa, osy iske qatysty eki adamdy jumystan bosatyp, biriniń taǵdyryn aldaǵy ýaqytta sheshetinin aıtyp úlgerdi. Bul týraly Eýrazıa birinshi arnasy habarlaıdy.
Zorlanǵany dáleldengen jasóspirimniń senimdi ókili Qurmanǵazy Músir osy iske qatysty keıbir ustazdardy jaýapqa tartýdy kózdep júr. Eger olardyń kinási dáleldenetin bolsa, onda birqatar adamnyń taǵdyry kúrt ózgerýi múmkin.
«Aldyn biz kútken bolatynbyz, tergeý amaldaryn dáleldenetinin nemese dáleldenbeıtinin. Búgingi tańda resmı málimet berildi Bas prokýratýramen. Dáleldenip otyr. Sol sebepten búgin aryz ótkizemiz prokýratýraǵa. Iaǵnı, mektep psıhologtaryna, tárbıe jónindegi mektep dırektor orynbasaryna, mektep dırektoryna qylmystyq is qozǵaý boıynsha» - deıdi jábirlenýshiniń senimdi ókili Qurmanǵazy Músir.
Sondaı-aq, áýel basta, tergeý amaldaryn júrgizgen aýdandyq ishki ister bóliminiń qyzmetkeri de zań júzinde jaýap berýi tıis deıdi Qurmanǵazy Músir. Aıtýynsha ózine beımálim bolǵan keıbir qujattar ózgelerdiń qolynda júr eken.
«Bylaısha aıtqanda, dostýp bolǵan. ashyp kórip, óz yńǵaıyna qaraıtyn. Nemese tergeý júrgizgen tergeýshi sol kisilerdiń yńǵaıyna oınaǵan. Iaǵnı, sol kisilerge barlyq málimetti berip, qolaıly jaǵdaı jasaǵan» - deıdi jábirlenýshiniń senimdi ókili Qurmanǵazy Músir.
Osy kúni 7 jasar bala men oǵan zorlyq kórsetti degen jasóspirimder oqyǵan qos mektepte tolqý basylǵan joq. Osy iske qatysty bir bilim uıasynyń tárbıe isi jónindegi orynbasary qyzmetinen ketse, dırektordyń biri zeınet jasyna baılanysty demalysqa shyǵypty. Ekinshi dırektordyń isi aldaǵy kúni "Nur Otan" partıasynyń búro otyrysynda qaralmaqshy. Sondyqtan, eki mektepte de qazir basqa adamdar ýaqytsha jetekshilik etip jatyr. Onyń biriniń tizginin sharýashylyq isi jónindegi orynbasaryna senip tapsyrylǵan. Biraq, ekeýi de bul iske esh qatysym joq deıdi.
«Psıhologtar da otpýskide. Bir psıhologymyz shyqty jumysqa. Endi sharasyn qoldanǵandar qoldanyp jatyr, endi meniń bul boıynsha habarym joq» - deıdi J. Balasaǵun atyndaǵy orta mektep dırektorynyń mindetin ýaqytsha atqarýshy Bıbigúl Smanalıeva.
«Endi boldym, eki kún ótti. Joq áli, qazir kapremont jasap jatyrmyz» - deıdi Ó.Jánibekov atyndaǵy orta mektebi dırektorynyń mindetin atqarýshy Narıman Sábıtov.
Aıtpaqshy, osydan eki aı buryn Abaı aýylyndaǵy mektepterde Astanalyq mamandar bir apta boıy tekserý júrgizipti. Quramynda prokýratýra men balalar quqyǵyn qorǵaý komıtetiniń qyzmetkerleri bar jumys toby birqatar kemshilikterdi anyqtap bergen.
«Kemshilikter boıynsha jalǵyz Abaıdaǵy 6 mektep ǵana emes ol barlyq mektepterde kezdesetin nárse ǵoı. Sol boıynsha is shara túzip, jumys aldaǵy tamyzda dırektorlar jumysqa túsedi sol kezde qolǵa alatyn bolamyz» - deıdi Saryaǵash jáne Keles aýdandary bilim bólimi basshysynyń mindetin qosa atqarýshy Nurman Úsipbaev.
Qoǵam nazaryn ózine aýdarǵan bul qylmystyq is jýyrda sotqa joldandy. Aıyptaý aktisimen bir jasóspirim anyqtalyp otyr. Senimdi ókildiń sózinshe, sot otyrysy jabyq esik jaǵdaıynda ótetin kórinedi. Al, jábirlenýshi balaǵa keletin bolsaq, ol Almatyda anasynyń janynda eken. Eki apasy Abaı aýylynda turyp jatyr.
