25 qyrkúıekte elordadaǵy “Spectrum” halyqaralyq mektebinde “Bilim-ınnovasıa” Halyqaralyq qoǵamdyq qorynyń basshysy Darhan Óte jahanǵa “The Eagle Huntress” degen atpen tanymal búrkitshi qyz Aısholpan Nurǵaıypqyzyna qordyń bilim grantyn tabystady dep habarlaıdy Qamshy.kz aqparat agenttigi kazaknews.kz-ke silteme jasaı otyryp.
Buǵan deıin Aısholpan týraly sújetti kórip, jetkinshektiń ónerine tańyrqaǵanyn aıtqan D. Óte ulttyq qundylyǵymyzdy dáriptep júrgen Aısholpannyń Otanyn bir kórgisi kelgen tilegin eskerip ári bolashaqta jahandaǵy úzdik joǵary oqý oryndarynda bilim alýǵa bar múmkindikti jasaý úshin “Bilim-ınnovasıa” Halyqaralyq qoǵamdyq qory bilim grantyn usynyp otyrǵanyn atap ótti. Bilim grantynyń quny 20 myń dollar turady.
Óz kezeginde elordadaǵy “Spectrum” halyqaralyq mektebiniń basshysy Artýr Tólepbekov Aısholpannyń bilim alýy úshin bar jaǵdaıdyń jasalatynyn atap ótti. Aısholpan “Spectrum” halyqaralyq mektebinde bilim alyp, tildik tanymdaryn ushtaıdy, sondaı-aq, jatyn orny men tamaǵy, oqý quraldarymen de qamtamasyz etiledi, dep málimdedi A. Tólepbekov.
Aısholpan Mońǵolıanyń Baıan-Ólgeı aımaǵynda jergilikti mektepterdiń birinde 12 synypta oqıdy. Bala kezinen qusbegilikke ákesi baýlyǵan. Aısholpannyń ózi Kazaknews.kz tilshisine bergen suhbaty barysynda qusbegilik ata-babasynan muraǵa qalyp kele jatqan óner ekendigin aıtady. Aısholpan bolashaqta jýrnalıs ıa aýdarmashy bolǵysy keletinin de jasyrmady.
2016 jyldyń qazanynda ataqty amerıkalyq rejıser Otto Bell Aısholpan týraly «Búrkitshi qyz» (The Eagle Huntress) derekti fılmin kópshiliktiń nazaryna usyndy. Fılm jaryqqa shyqqannan keıin Aısholpan álemdik bilim men ǵylym salasynda kóshbasshy sanalatyn Garvard jáne Oksford ýnıversıtetterine shaqyrtý aldy.
Óz kezeginde, búgingi bilim grantyn tabystaý otyrysy barysynda Almaty qalasyndaǵy Súleıman Demırel atyndaǵy ýnıversıtet Aısholpanǵa kez kelgen mamandyqqa bilim grantyn usynyp, kýáligin tabystady.
“Bilim-ınnovasıa” HQQ basshysy Darhan Óteniń sózinshe, Aısholpan óz qalaýy boıynsha halyqaralyq mektepte 2 jyl bilim alady.
Aısholpannyń anasy Almagúl qyzyna bilim alyp, jan-jaqty shyńdalýyna bar múmkindik berip otyrǵan Qazaqstanǵa jáne “Bilim-ınnovasıa” Halyqaralyq qoǵamdyq qoryna zor alǵysyn bildirdi.
